Diadomingo tin Concierto di Hannukah cu un bunita mensahe di union y luz pa Aruba

Ex-rehen Israeli Omer Shem Tov tambe lo ta presente

ORANJESTAD (AAN): Mientras e Festival di Luz ta wordo celebra mundialmente, Hannukah tin un significado renoba e aña aki como un recordatorio poderoso di resistencia, unidad y speranza. Despues di e atake tragico durante un evento di Hanukah na Sydney, e mensahe central di Hannukah ta: luz ta gana riba scuridad, y bondad ta semper mas fuerte cu odio.

   Hannukah ta un celebracion di 8 dia pa conmemora e victoria di luz riba scuridad y di fe y perseverancia di e pueblo Hudiu riba opresion di mas di 2000 aña pasa, marcando tambe e rededicacion di e Tempel Santu na Jerusalem, na unda cu un tiki cantidad di azeta, milagrosamente a kima pa ocho dia. Esaki a keda como un simbolo eterno di fortalesa spiritual, corahe y speranza den tempo di dificulad. Awe, e mensahe aki ta sigui inspira hende di diferente cultura y generacion.

   Na Aruba, e mensahe aki a wordo expresa di un manera bunita durante e prome mita di e festividad, cu cendemento publico di menorah na Palm Beach y na diferente luga riba nos isla y a trece residente y bishitantenan hunto den un momento di refleccion, calidez y union. Cu e bunita background di lama y cielo, e vlamnan a kima cu orguyo, simbolisando speranza, resistencia y e forsa duradero di e comunidd Hudiu y e importancia di para hunto, apesar di tempo dificil. Cada vlam ta un recordatorio cu bondad semper ta supera e malo y cu un poco luz por tapa tapa scuridad y haci un diferencia significativo.

   Continuando cu e mesun spirito di union, pueblo di Aruba ta wordo invita, riba e ultimo anochi di Hannukah, pa un concierto gratis, Diadomingo awor, dia 21 di December, pa 5:30 pm riba beach patras di Hilton Hotel. E evento ta habri pa tur hende y lo presenta musica animado di Aaron Holder, y un mensahe conmovedor di ex-rehen Omer Shem Tov, kende su bida ta un ehemplo di curashi, fe y speranza.

  Organizadornan ta invita tur hende di tur background pa asisti y afirma cu balornan, union y luz a mas fuerte cu odio. Specialmente den temponan di dificultad, pa uni den un manera pasivo, ta un manera significativo pa mustra sosten na luz, speranza y comunidad.