Den Pasco y Aña Nobo nan ta mas sensibel:
ORANJESTAD (AAN) Den pueblo por scucha comentarionan aki, aya, cu e aña aki a pasa, y ta cabando, den un frega di wowo.
Berdad ta cu ultimo añanan ta parce comosifuera e tempo tin hala cada bez mas veloz, y diripiente mayornan ta mira yiunan chikito bira grandi lihe, adolescentenan bayendo afo pa sigui studia, otronan cuminza forma nan propio famia, y yiunan mes wak nan tata y mama bira adulto mayor, y nan welo-welanan birando hendenan grandi caba, cu ya no por percura pa nan mes. Tur esaki, claro, ta loke nos ta yama “ley di bida” di cual ningun hende por scapa. Bunita ta cu tin famianan hopi uni, cu semper ta percura un pa otro, y cu nan grandinan ta un bendicion y un tesoro cu nan ta cuida hopi, y incluso ta bon di salud, no obstante nan edad avanza.
Pero tambe tin nos grandinan cu nan famia no por percura pa nan, pa diferente circunstancia, y cu ta pasa den hopi tristeza ora mester wordo aleha di nan ambiente di cas, nan “habitat” y tin cu drenta un cas di cuido, loke incluso por cera un ciclo di bida, ora cu un di nos grandinan ta fayece fuera di su cas, pa motibo di tristeza y depresion.
Pesey, ta bon pa pone man na curazon, y yiunan cu nan mayornan ta den un cas di cuido, y tambe e nietonan cu e grandinan aki a tuma encargo di nan ora nan tabata chikito, a duna nan hopi amor, a comparti y a tuma di nan hopi cariño, bishita nan na un forma special durante e temporada aki di Pasco y Aña Nobo.
No laga los sin mas, e lazo mas fuerte cu a rondona e pilar di nan hogar, Corda semper kico e grandinan aki, cu awo ta biba den soledad pasobra no tin nan famia hunto cu nan, a duna casi nan propio bida pa bienestar di nan yiunan y hasta nan nietonan. Dijs papia cu boso curazon, bay un rato den boso recuerdonan di infancia te adolescencia y edad adulto, na unda sin falta bo mayor a extende su mannan hop hancho, pa percura duna bo e miho di nan mes.
Awo ta turno di nan yiunan entrega nan, nan miho version di ser yiu/nieto cu ta balora y gradici. Corda cu Pasco y Aña Nobo na haci nan mas sensibel.
