Birgen del Carmen ta e patrona di transporte
ORANJESTAD (AAN): Parokia Cristo Rey, hunto cu Pastoor Andry, na un manera special, kier gradici tur esnan den transporte, pa e bon trabao cu nan ta eherce tur dia na bienestar di comunidad.
Y pa pidi proteccion pa cada un di nos, momento cu ta haci uzo di un medio di transporte.
Riba 16 di juli 8:00 di mainta, dia cu ta celebra “Birgen del Carmen” patrona di e almanan den purgatorio y medio di transporte, ta invita bo cordialmente pa hunto den famia, cu colega y amistadnan bin celebra Santa Misa den nos Parokia Cristo Rey Brazil.
Pastoor Andry ta duna un bendicion special y cada un ta ricibi un scapulario y un oracion pa semper bo(so) ta bon proteha riba careteranan y riba lama. Esaki ta e oportunidad pa bendiciona tur medio di transporte ariba e mainta aki. Ta deseo y anhelo, pa haya e comunidad su colaboracion pa acepta e invitacion y bin cu boso medio di transporte y uniforma si ta posibel.
Entre otro esunnan cu ta traha cu Taxi, Autobus, Polis, Brandweer, Marinier y Clasic Cars. Despues hunto nos ta sali den un “Caravana di Bendicion” compaña pa nos Birgen del Carmen pa saluda e pueblo di entre otro di Brazil, un area di Savaneta y San Nicolas.
Ta e deseo di por conta cu nan presencia durante Santa Misa y cu por compaña cu e medio di transporte den nan Caravana di Bendicion.
