Frank Benita, di RWZI:
ORANJESTAD (AAN) – Den entrevista cu señor Frank Benita, empleado di DOW den e Seccion di RWZI, el a informa Matutino DIARIO, cu e ultimo simannan nan a ripara cu vet ta drentando den e sistema y cu un cantidad masha halto di vet ta wordo tira den Aruba su sistema di riolering na Palm Beach, area High Rise Hotels.
Benita a bisa cu esaki ta treciendo complicacionnan den e parti biologico di e planta, y un bez cu e vet drenta den e sistema e pomp no ta funciona normalmente, cu consecuencia cu awa di riool ta subi caminda.
Benita a señala cu ultimo dos simannan e situacion a bira peor, unda cu tres pa cuater dia consecutivamente vet ta wordo tira den e sistema y durante dianan a forma plok den e sistema di bombeo, y a tranca un di e pompnan y awa a bin dilanti di e area turistico na Riu, y e problema grandi ta den e sector di Horeca. Esaki ta trece complicacionnan den e ekipo di pomp, door cu nan ta traha cu floater y un bez cu esaki bin ariba e pomp no ta bay funciona, sigur pa e pa e proceso biologico.
Señor Benita a agrega cu pa e ultimo tempo despues cu nan a instala un aparato special, den e planta a ripara un tiki mehoracion den e proceso biologico, unda cu e mal holo a cuminza bira un tiki menos, pero di biaha, siman pasa, ora cu e vet a drenta e micro-organismonan no por cu esaki, anto a cuminza crea atrobe e mal holo.
El a agrega cu e team di RWZI hunto cu esun di Riolering a actua hopi lihe pa haci esaki limpi, y toch awe tin un miho balance den e proceso.
El a splica cu claramente e pomp tin su sistema di proteccion pero nan ta haya cu si e ta kima e pompnan, e ora ey nan tin cu saca e pompnan hiba nan drecha y esaki ta tuma su tempo, y tin consecuencia pa e ekiponan. Benita a subraya cu e sistema di roil cu ta bin di e areanan di high rise y low rise, tur ta conecta solamente na Horeca Center. Nan no ta conecta na sector of casnan priva. Riba e linea ey tin cuater area ta conecta: E linea cu ta drenta RWZI Bubali, uno ta bin di Oranjestad, dos y tres ta low rise hotels di Tamarijn, High rise hotel y e di cuater di Palm Beach, pero nan ta full separa for di otro, kiermen no ta conecta na otro.
{gallery}E ultimo simannan, un cantidad masha halto di vet a wordo tira den e sistema na Palm Beach{/gallery}
