Actividad organisa pa National Down Syndrome Society
ORANJESTAD (AAN): Recientemente e modelo special Kaythairy Richardson cu su nomber di cariño ‘Kay’ di e organisacion local “Sea Bunita Sea Bo Mes” na Aruba, su imagen a sali riba un di e pantayanan gigantesco (billboard) den Times Square na New York City.
Esaki a worde estrena mientras cu miles di persona por a wak e evento aki cu National Down Syndrome Society (NDSS) a organiza riba Times Square na New York pa 2023.
Anualmente NDSS ta recorda riba e “cariño special” cu personanan cu Down Syndrome tâ influencia den nos Comunidad. Durante un presentacion riba e bilboard den Times Square na New York, 500 persona cu ta consisti di mucha te cu adulto cu ta Down Syndrome a worde presenta. E video mas bien ta un forma di recorda y contribui logronan y balor cu personanan cu Down Syndrome tin den nos comunidad. E meta di NDSS ta pa crea concientisacion, acceptacion y inclushon pa e personanan cu tin Down Syndrome.
E atardi ey, masha hopi famia a bin for di tur skina di mundo y a topa na New York pa participa den diferente evento cu a worde organiza pa NDSS. Despues di mustra e video riba Times Square tur participante a asisti na diferente evento cu e organizashon a presenta. Tabata tin entre otro un ceremonia di apertura di NYC buddy Walk, un fiesta pa entrega di premio. Tur esakinan a worde tansmiti tambe vitualmente na mas cu 150 ciudad na Merca y tambe den diferente parti na mundo, unda mas di 325 mil persona a conecta via di internet.
Esaki ta un otro evenemento cu NDSS cual ‘Fundacion Sea Bunita Sea Bo Mes’ ta forma parti, a logra organiza, caminda Kaythairy Richardson di Aruba y tur otro persona cu Down Syndrome por a participa. Esaki sigur ta un tremendo logro pa Aruba.
Fundacion Sea Bunita Sea Bo Mes ta invita pueblo di Aruba engeneral pa bin apoya nos hendenan special diasabra dia 21 di October na Renaissance Convention Center unda cu nan lo demostra na tur hende nan talentonan cu nan lema stima ta inclui y no ta exclui.
