ORANJESTAD (AAN): Director di Instituto Medico San Nicolas (ImSan), Joel Rajnherc a duna di conoce cu nan ta hopi contento cu AZV ta reconoce tur e bon trabao cu ta wordo haci na ImSan y tambe financieramente kico esaki kiermen pa Aruba.
Actualmente ImSan ta tratando aproximadamente 250 hende anualmente cu radioterapia y cu nan no tin cu bay afo mas y cu casi no tin niun pashent cu
mester wordo manda afo pa e tratamento aki. Tin algun masha specifico cu tin cu bay afo, por ehempel, mucha cu problemanan cu tin cu wordo trata di tumor cerebral. Esey ta predominantemente muchanan cu ta wordo trata cu 'protonentherapie', a bisa.
E mashin ey su so ta costa mas cu 30 miyon dollar y esey ta un ekipo cu na Aruba no lo bay tin nunca y no ta bal la pena tampoco, e medico a remarca, pasobra e mester ta eficiente. Mester por tin suficiente experticio cu tur cos cu ta wordo haci y mester tin suficiente pashent pa haci'e financieramente efectivo, e agrega.
Segun Dr. Rajnherc door cu ImSan ta yuda pa mantene e placa na Aruba esaki tambe a beneficia ImSan y tin oportunidad pa haci riba otro terenonan diagnostico di otro pashentnan. A cumpra varios aparato nobo pa e tratamento y diagnostico di wowo. Tin un di dos microscop awor cu ta haci cu riba cierto dianan hasta dos sala di operacion conhuntamente cu ekiponan completo por wordo uza pa trata pashent di wowo, principalmente ora tin un situacion di emergencia.
Esey ta e beneficionan y ta bira posibel door cu ImSan a haya un extra inyeccion di financiamento door di AZV cu ta beneficia e pashent. Tambe tin modernisacion den otro departamentonan manera sterilisacion, radiologia, unda ta saca e potretnan. Tin un dokter extra di retina cu ta un specialista di wordo cu ta bin un siman pa cada luna for di Corsou pa yuda na ImSan.
Ta buscando un di dos dokter continuamente disponibel pa ImSan, pero no por haya un y esey ta un di e problemanan mayor cu tin awor na henter mundo, ya cu no tin suficiente profesionalnan den cuido medico, Dr. Joel Rajnherc a indica.
