Diabierna tabatin destaho publico pa drecha e holoshi grandi aki

Ta bay Restaura Willem III Toren

ORANJSTAD (AAN): Riba Diabierna a tuma lugar Destaho Publico teni door di Fundacion Museo Arubano, titula ‘Restauratie Willem III toren te Oranjestraat’.

   E trabao ta pa tene un mantenimento na e monumental toren aki pa e Fundacion, y pone e holoshi historico bek den funcion.

   E holoshi di basta tempo no ta funciona mas, y esey tabata algo cu hopi hende den comunidad tabata haya un lastima.  E destaho publico a tuma lugar Diabierna mainta na oficina di director di Monumentenbureau.

   Willem III Toren ta situa net na Fort Zoutman.  E Fort mes a wordo construi na aña 1798 pa defende Paardenbaai, y e ta forma e edificio mas bieu di Aruba.  E Toren mes a wordo construi na 1859.  Awendia e Toren ta sirbi como entrada pa bay den Fort Zoutman, den cual aworaki tin Museo Historico Aruba ubica.