Diabierna mainta a captura 1.200 kilo di droga riba lama cerca di islanan ABC

ORANJESTAD (AAN): Diabierna mainta, e barco di Marina Hulandes, esta Zr.Ms. Groningen

a logra di yuda intercepta un contrabando di droga cu e momentonan ey tabata pasando den lama den cercania di islanan ABC.

   Nan a intercepta un transporte di 1.200 kilo di droga.  Esaki a bira e di 14 captura di droga pa e barco Zr.Ms. Groningen desde cu e stationschip aki na April 2022 a cuminza nabega den Lama Caribe.  Cu e captura aki, autoridadnan Hulandes di Januari 2022 te cu awor a logra di confisca como 10.000 kilo.

   A sali na cla cu e barco Groningen a drenta den accion, despues di a haya notificacion ci Maritiem Operatie Centrum (MOC) di Wardacosta di Caribe Hulandes.  E helicopter di Wardacosta mesora a wordo manda den area di e boto sospechoso, y nan a sigui persigui esaki riba lama.

   Ora cu e barco Groningen a cuminza yega cerca, nan a lanza nan dos speedboat tipo FRISC pa bay intercepta e speedboat tipo Go-Fast cu keto bay tabata trata na huy.  Cu tactica, e oficialnan a logra stop e Go-Fast.

   Tabatin 4 persona abordo di e Go-Fast, y en total tabatin 53 paki abordo, cu a yega na un piso di 1.200 kilo di droga.

   E cuatro sospechosonan aki y e droga a wordo entrega na Cuerpo Policial di Curaçao cu lo sigui investiga e caso aki.  E droga cu a wordo confisca, ya caba a keda destrui.