ORANJESTAD (AAN): Pa un solo anochi, publico di Aruba ta invita pa bay haya sa tur cos di e pais Suriname den un evento titula ‘A Taste of Suriname’, y esaki lo ta den Fort Zoutman na Playa.
Directorado di Turismo na Suriname, hunto cu Suriname Hospitality and Tourism Association (SHATA), Surinam Airways, y METS Travel & Tours ta colaborando cu e evento aki, cu ta priminti di lo ta algo emocionante riba Diabierna 27 October 2023.
Nan ta extende un invitacion cordial na comunidad Arubano pa bin disfruta di un evento unico y diverso cu lo trece un pida di Suriname na Aruba. Durante e anochi aki, nan lo revela e rikesa di naturalesa y cultura di Suriname, cu ta absolutamente impresionante. Bo lo tin e oportunidad di purba y cumpra e delicioso cuminda y bebidanan caracteristico di Suriname pa biba un experiencia autentico. Entrada ta completamente gratis.
E anochi ey na Fort Zoutman, lo tin entretenimento den forma di musica di e talentoso grupo Buleria y e musica Surnameño di DJ Ricardo. Lo tin tambe un biahe grandioso cu nan lo rifa y regala entre tur esnan presente. E premio aki lo ta un biahe impresionante di 4 dia pa Suriname pa bo conoce mas di e naturalesa y cultura vibrante y diverso di e pais aki. Un aventura cu bo lo no lubida.
E actividad lo ta Diabierna 27 October 2023 for di 7:00 pm te cu 10:00 pm.
