Aruba Marriott a organisa evento di 'Masters of the Craft'

Un competencia interno di cushinamento y ’bartending’

ORANJESTAD (AAN):  Durante un dia yena di entusiasmo, e compleho di Aruba Marriott a organisa su di cuater edicion di “Masters Of The Craft”, un competencia interno, organisa pa Marriott International y cu ta wordo ehecuta mundialmente. Manera e nomber mes ta bisa, e competencia aki ta pa e meastronan den nan arte, treciendo e oportunidad pa nan por presenta creacionnan sublime na e huradonan y asina competi den e area di sea cushina of ‘bartending’.

            Cu un total di seis participante pa e competencia di ‘bartending’, e mainta a cuminsa cu un ballroom yena di asociadonan cu gran anticipacion pa mira e competencia y apoya esnan participando. E maestro di ceremonia a introduci e ingrediente misterioso cu tabata ‘tamarijn’ y asina e tempo a start pa e participantenan prepara nan bebida cu speransa di traha esun cu mihor sabor, presentacion y creatividad.

            Tres hurado cu experencia y experticio den ‘bartending’ a wordo pre-selecta pa asina apunta e bebidadanan ariba e diferente aspectonan y hunto saca e ganador. Esaki a termina den e man di Derry Palm, cu a presenta su “Italian Summer Refresher”, y kende ta su prome biaha compitiendo den “Masters Of The Craft” representando su departamento, Campeones Cantina & Tequila Bar.

            Pa e competencia di cushinamento, diestres participante a inscribi pa competi. Durante e competencia, e publico por a disfruta di aromanan sumamente agradabel cu tabata yena e ballroom segun cu e participantenan tabata prepara nan plato usando e ingrediente misterioso, esta “mushrooms”. Un atardi yena di sabor, a termina cu e huradonan determinando e ganador, cu a keda na e persona di Ingrid Rodriguez, kende a presenta un tremendo plato cu e nomber “Goliath” cu sigur a laga e palet di e huradonan satisfecho.

            E compleho di Aruba Marriott ta felicita e ganador nan di “Masters Of The Craft” kende awor ta bay pa e siguiente ronde, caminda nan lo competi virtualmente den cada area, esta cushina y bar, y si nan gana un biaha mas, lo cay den e gran final, caminda nan lo biaha pa “headquarters” na Miami y competi contra otro ganadornan mundialmente.