ORANJESTAD (AAN)-- Stichting Rancho a yama un conferencia di prensa den cual su director Clifford Rosa, a gradici e medionan di comunicacion social, pa nan sosten y pa divulga den pueblo locual e fundacion ta haciendo. Y un di e herencianan cu ta bay haya hopi enfoke y atencion ta “e piscado” y piscamento.
El a informa cu den e caso aki, e fundacion ta rond di e celebracion di 200 aña di Oranjestad, y bao di e tema aki ta pensa riba diferente actividad y proyecto, pero
e proyecto inicial nan a pens’ e for di aña 2020 caba. Esaki ta kico ta bay haci cu pesca di Rancho.
“Fundacion Rancho den su statuto ta stipula pa conserva y preserva pesca y piscamento pa e piscado di Rancho. Esaki ta hopi basico cu nos tin den nos statuto y nos kier sigui elabora riba dje. Y esey nos ta bisa cu arte y cultura ta dos tematica cu sigur ta uni otro of mester ta uni pa uni un comunidad”, Rosa a señala.
“Den esaki e fundacion a traha duro pa traha un proyecto yama ‘Oda na e piscado’ y esaki ta algo cu e curator Ana Maria Hernandez lo splica, ademas di e programanan cu ta bay tin, entorno di esaki. Y tambe e artista cu a haci e trabao posible cu ta Samuel Sarmiento. Tur esaki ta bay ta e presentacion cu ta bay tin pa diabierna 16 di Juni awo den e edificio di Rancho na Visstraat #1, unda ta bay habri otro exposicion”, Clifford Rosa a comenta.
El a agrega cu esaki pa e Fundacion ta hopi importante, pa locual nan a pasa den 2020, 2021 y 2022, pa por compronde un tiki e importancia di e pueblo su herencia. Esaki sigur ta bay ta algo pa educa comunidad y pesey e fundacion ta invita tur hende di chikito te grandi. El a bisa cu e tema aki ta toca henter pueblo, y ta un momento mas di reflexion. “Un di nos herencianan ta e piscado con el a biba, con el a haci y e strugglenan cu tin tambe pa e piscado. Pues, tur esey nos lo toca tambe como tema, den e transcurso di simannan, cu e exposicion aki”, Clifford Rosa a relata.
