ORANJESTAD (AAN): Recientemente a tuma luga na Clinica di Dialisis di Horacio Oduber Hospital (HOH) un sesion di informacion tocante transplante di riñon. Un sesion unda tabatin presente e team completo di HOH encarga cu transplante di riñon y tambe coleganan di Clinica di Dialisis hunto cu specialista y trahado social.
Anualmente ta organisa e sesion aki pa asina tur
esnan interesa, tambe esnan cu ya ta bezig cu test y tambe esnan cu ya ta riba lista pa haci un transplante di riñon pa asina nan ta bon informa di e proceso completo.
Pa algun aña e sesion aki no a tuma luga door di e pandemia di Covid-19 pero awo Clinica di Dialisis a sali ful swing bek cu ne. Un sala completamente yen unda hopi informacion a wordo duna y experiencianan di pashent a ser intercambia.
Ken por ta un donante di un riñon?
‘Un donante por ta un famia of conocir cu ta dispuesto pa haci esaki. Esaki nos ta yama un donante bibo. E por ta tambe un persona cu na bida a dicidi cu despues cu e fayece di por duna su organonan na un persona cu mester, pues un donante postmortal’, asina Glenda Bosnie di team di transplantatie a conta.
Ken por bin na remarke pa transplante di riñon?
En principio tur persona cu ta dialisa por bin na remarke pa un transplante. E nefrologo (specialista di riñon) ta evalua ken por bin na remarke. Esaki basa ariba criterianan internacional.
Por ehempel e pashent mester ta den condicion fisico stabiel y tambe e mester cumpli cu su ‘vochtintake’, remedi y mas.
Criteria pa un donante di riñon
E donante mester ta den un condicion fisico optimal y lo mester examina su sanger pa
determina si e por ta un donante. Tambe e lo mester pasa den un serie di otro testnan y
su tipo di sanger mester ta compatibel cu esun di e pashent.
Te cu awo tur transplante di riñon ta tuma luga na AMC Amsterdam Medisch Centrum Hulanda cual tin un acuerdo di cooperacion pa algun aña caba. Pues, anualmente tin diferente pashent ta bay pa asina haci un transplante di riñon na Hulanda unabes logra haya un donante.
Un anochi sumamente interesante cu hopi intercambio di informacion. Danki ta bay na tur profesional cu a brinda informacion, tambe team completo di transplante di riñon y coleganan di Clinica di Dialisis cu a haci e anochi aki posibel.
