ORANJESTAD (AAN): Ultimo lunanan por a tuma nota di informacion cu ta bin for di Peninsula di Paraguana na Venezuela, unda hopi famia ta insisti cu un miembro di nan lo a subi un boto pa bay rumbo Aruba, sinembargo nunca mas a tende algo di nan.
Eseynan a bin acerca di numeroso casonan similar cu a yega di socede den pasado, unda hendenan ta busca forma di cruza e canal entre Venezuela pa
busca un mihor bida na Aruba, pero hamas ta yega e “isla feliz” pasobra algo catastrofico a socede cu e boto, of cu nan mes.
Prueba di tur esaki, ta loke a socede Dialuna marduga na costa noordoost di Aruba! Un biaha mas un boto a logra di cruza for di Venezuela rumbo pa Aruba, sin cu e radarnan a detecta esaki. Envez di baha e personanan indocumenta sea na Baby Beach den Colony, of banda di Mangel Halto na Savaneta, e biaha aki e capitan a dicidi na nabega un extra 9 pa 10 km pasa pariba di cabez di Aruba pa yega na un di e bocanan di Vader Piet.
E capitan aki no conoce e area, y no tabata sa kizas cu e bientonan fuerte di Dialuna marduga di entre 20 y 39 km/h, cu tin biaha rafaga te cu 50 km/h, tabata produci lama bruto cu olanan di como 6 pa 7 pia halto, y esaki ta aun mas bruto na parti noordoost.
Como cu na Vader Piet no tin ningun lugar ‘clear cut’ pa drenta y baha cu su pasaheronan y cargamento di droga, e Capitan lo a ordena tur hende baha eynan mes.
Den e area ey, hasta un landador full diploma lo bay tin dificultad pa yega tera. E coriente di lama na e area ey ta asina fuerte, combina cu un rip-current cu den un frega di wowo ta halabo mas panort of pazuid.
Resultado di esey ta cu varios di e hendenan den awa a bay pega den baranca, y a keda wanta eynan sin cu por move ningun caminda. Otronan a keda landa y busca forma pa haya un entrada pa tera, pero a keda sin logra y finalmente cualkier golpi combina cu cansancio den e lama bruto ey, lo a cobra nan bida.
Mainta ora cu solo a caba di sali, ainda ningun hende tabata sa di e tragedia pasando na costa cerca di Vader Piet.
Te banda di 8:15 am, personal di Fundacion Parke Nacional Aruba a bati alarma na Central di Polis cu un hende homber di habla hispano a yega na un trahado di nan, pa avisa cu marduga el a drenta Aruba ilegal y cu 2 di su compañeronan ta mal pega bao baranca.
Mesora Central di Polis a cuminsa manda patruya, brandweer, personal di kustwacht y ambulans na Vader Piet. Na e lugar enberdad patruya ta informa cu nan ta wak dos hende homber bou di e baranca pero cu e situacion di e lama ta hopi malo y dificil pa nan mes rescata nan.
Personal di helicopter di Cuerpo Policial a logra maniobra y saca e dos hombernan aki. Mesora e personal di Helicopter a sigui busca y un poco mas panort nan a bin mira cu tin 2 curpa humano sin bida ta drief y basta purun preto ta drief riba lama.
Pa e Helicopter di polis tabata practicamente imposibel pa saca nan di lama. Mesora personal di bombero den bon coordinacion ta logra baha y saca e dos curpanan sin bida plus e purun cu probablemente tin droga aden.
Sigur un bon coordinacion, unda a usa tambe e helicopter di Wardacosta di Caribe Hulandes pa keda monitor e situacion for di lama.
Pues na final, por conclui cu den bon coordinacion cu otro departamentonan a logra rescata 3 persona na bida. Pero 2 persona sin bida a ser saca for di costa. Alavez autoridad ta haya basta purun di droga y tur a worde confisca.
E 3 personan a worde trata door di personal di ambulans y despues di tratamento nan a worde deteni y hiba warda pendiente mas investigacion.
E purun nan tambe a worde confisca y lo habrinan pa haci e testnan necesario pa wak ki sorto di droga tin den nan.
DIARIO y Cuerpo Policial ta manda palabra di condolencia na famia di e fayecidonan.
Ta di spera cu awe lo bay duna informacion di e sexo di esnan cu a wordo rescata, esnan cu a wordo haya morto, y tambe ki tipo di droga tabatin den purun.
