Garreth Tromp, Manager Bloedbank:
ORANJESTAD (AAN) – Factornan cu por hunga un rol, cu no tur hende cu por bira dunado di sanger na Aruba ta bin Bloedbank, cu e bunita gesto boluntario aki.
Un di e factornan ta cu tin hende tin e idea cu e angua pa extrae e sanger ta basta diki. Garreth Tromp, manager di LAB-HOH y Bloedbank, a comenta cu esaki ta algo cu ta pica por ta pa 2 seconde, y despues e persona ta lubida cu tin un angua den su brasa. E mes ta dunado y e sa con esey ta.
“Pero mi ta kere cu tambe tin hende cu ta biba nan bida segun un schedule, cu por ta no tur ora nan ta disponible na momento cu nos ta yama nan. Esnan cu nos ta haya ta basta medewerker y basta dunado di trabao. Nos ta bezig si cu un investigacion interno pa wak con miho nos por brinda un servicio cu ta pas na nos donantenan, pero esey ta algo cu nos ta bezig cu ne ainda. Asina nos caba, nos mester di personanan cu ta dispuesto”, Garreth Tromp a señala.
E grupo meta cu Banco di Sanger tin ta hende den edad entre 18 te cu 65 aña. “Si bo ta un persona saludabel, cu ta den e categoria di edad aki, nos mester di bo.
Tromp a indica cu riba Bloedbank su website tin tur informacion tocante e rekisitonan cu esnan interesa por consulta. Esnan cu ta bin na remarca ta haya test di sanger, di life style tambe y ki riesgo por tin pa e producto cu Banco di Sanger ta genera.
“Apesar cu nos ta haci test nos tin ta percura pa e miho seguridad posible. Pero ora e persona acerca Bloedbank nan ta informe di tur cos den detaye. E rol cu e dunado di sanger tin ta eigenlijk como un ‘life saver’, cu su sanger por scapa bida di hopi persona na Aruba, incluso hende cu bo conoce”, Garreth Tromp a reitera.
Diabierna awo, 13 di Juni, Bloedbank tin un celebracion di e Dia Mundial di “World Donner Day”. Oficialmente, e fecha ta diasabra 14, pero Bloedbank ta celebre Diabierna traimerdia, di 12 or pa 5 or. Merdia tin e opendag caminda esnan cu ta dunado of esnan interesa den bira donante, ta bin conoce e proceso pa haci e produccion di e tres productonan cu nan tin, pa hacie mas sigur posibel.
“Esey ta un proceso masha amplio mes y bo por wak con esey ta bay y kico ta pasa cu e sanger”, Garreth Tromp a splica. E ta un dia pa pone e boluntarionan nan reconocemento cu nan ta un “lifesaver”. Pues e ta un dia pa nan!
