Dia 9 di Augustus 2025...
- Huradonan lo bay huzga 3 criteria so di awor en adelante
ORANJESTAD (AAN): E siman aki durante un conferencia di prensa, Stichting Musica a divulga cu Aruba Caiso Monarch 2025 lo bay ta riba Diasabra 9 di Augustus venidero, y cu e titulo di ‘Calypso Showdown’.
Por corda cu den Carnaval di 2025, tabatin solamente competencia di Soca Monarch, y a laga Caiso Monarch afo. Y awor tur cos ta cla pa esaki tuma lugar aki dos luna.
E nomber oficial a bira: “Aruba Caiso Monarch 2025: Calypso Showdown”, y lo bay ta dilanti Kulture Cafe den aire liber na San Nicolas. Esaki ta dilanti di Nicolaas Store riba e rotonde.
Calypso Showdown lo cobra 35 Florin pa entrada, y di antemano gruponan por busca mesa tambe. Luz y sonido lo ta den man di Elite Productions. Entrada ya caba ta obtenibel via e plataforma Pay.aw pa asina por sigura bo entrada.
E evento e anochi aki lo bay tin 15 participante, tur composicion ta original y lo bay wordo presenta den forma di un show. Lo tin 5 finalista, pero e ganador principal ta esun cu ta bay cu tur e premio di 10.000 Florin cash, pues “winner takes it all”.
Tur 15 participante lo presenta cu un All-Star Band consistiendo di musiconan local y bao direccion di Dwight Leoneta.
Reglanan a cambia: Segun John Hassell, kende tambe a hiba palabra, pa e participantenan tambe tin di nota cu a bin cu cambio rules and regulations special pa Caiso, pero tambe pa futuro den Soca. El a splica cu antes tabatin 7 pa 9 hurado cu ta huzga 5 criteria, awor el a wordo reparti cu 3 hurado pa cada criteria.
Segun Hassell, esey nifica cu pa e Calypso Showdown lo tin tin 3 criteria pa huzga, esta (1) Musica, (2) Letra, y (3) Presentacion. Cada criteria tin 3 hurado.
Pa e anochi aki, lo sigui mantene e ‘Olympic system’ pa huzgamento, pues e punto mas halto y punto mas abao di cada criteria ta cay afo. Esey ta e forma mas husto posibel. E grupo a yega na e areglo aki cu musiconan mes cu tabata presente na cada reunion.
President di Musica y John Hassel lo bay tene pronto un charla special, unda lo splica detayadamente henter e sistema di rules and regulations nobo aki pa Soca Monarch y tambe Caiso Monarch pa Aruba di awor en adelante. Pronto DIARIO lo publica fecha di e charla aki pa musiconan ta presente pa haya e splicacion.
E deseo ta pa e Calypso Showdown aki bay mas honesto, y mas husto posibel. Usando un All-Star Band ta kita tambe e nocion cu cada banda tabatin cierto ventaha cu nan fanaticonan. Pero cu All-Star Band, ta huzga djis e cantante, su cancion, su letra, y su presentacion.
