Diabierna anochi Fundacion Savaneta tin su Parada di Mascarada

Norman Thijsen, a duna di conoce:

*Reinanan di Savaneta a bira conoci 

ORANJESTAD (AAN) Norman Thijsen, presidente di Fundacion Savaneta Prome Capital, den entrevista cu Matutino DIARIO, a duna informacion tocante e Parada di Mascarada cu e Fundacion ta organizando pa Diabierna 6 di Februari venidero, y tambe presentacion di nan Reinanan.

   “Diadomingo cu a pasa, na MFA, e fundacion a tene e acto di coronacion di su reinanan di carnaval Savaneta 2026, cu lo ta presente den e Parada di Mascarada. Nan nombernan ta: Julienne Schwengle; Señora Carnaval 2026 y Kailani Zulema Schwengle, Reina di Carnaval 2026. Reina Hubenil ta Manon Kraaijkamp, Reina Infantil ta Leah Sophia Geerman, y Princesita Carnaval al ta Zinzy Rose Arends”, señor Thijsen a duna di conoce.

   Señor Norman Thijsen a splica cu nan a scoge reinanan pa habri nan Parada di Mascarada; nan no ta reina cu ta bay participa pa Aruba en general, pero nan ta reinanan di Fundacion Savaneta pa nan Parada di Mascarada.

   “Pa mi ta hopi amenos pa mi bin responde den amistad, nos t’asina contento aki na MFA, cu nos tin nos corona di nos reinanan, di tanto Señora Carnaval, como Reina Hubenil y Infantil, den un ambiente hopi ameno. Di mesun forma nos Fundacion a scoge pa traha pa Savaneta specificamente, pero nos no ta bay participa den eleccion di reina en general, pero si nos tin nos mesun eventonan”, señor Norman Thijsen a señala.

   Thijsen a sigui splica cu e meta ta pa rebiba tur loke antes tabata tin balornan cu no a tuma lugar mas. “Savaneta tabata hopi fuerte den carnaval antes, pero a bin un periodo hopi keto pa hopi aña anto nos kier cuminza traha bek riba esey. Pero nos ta mantene kedando den nos regio di Savaneta”, señor Norman Thijsen a señala.