Yvonne Bermudez, Comision Vision Pedagogico:
ORANJESTAD (AAN) Señora Yvonne Bermudez, di Comision Vision Pedagogico Aruba, den entrevista cu DIARIO, den cuadro di e campaña di concientizacion riba seguridad di mucha y hoben den e temporada di carnaval, a sigui splica cu nan deseo tabata pa enfoca riba algun punto mas, pero mirando cu e carnaval ta bayendo di forma acelera, nan ta continua cu loke nan ta treciendo dilanti caba.
El a comenta cu nan a cuminza tres aña pasa cu enfoke riba e muchanan, aña pasa nan a enfoca riba mayornan di nos hobennan, pa tene cuenta cu tin algun preparacion pa haci, y cu no por laga nan yiu bay un evento, anto despues lamenta, kico por a pasa.
“Nos ta pidiendo mayornan pa haci palabracionnan fiho cu nan yiu, kico nan ta spera di nan, y no e mainta cu nan bay carnaval pero for di dianan prome. Nos tips, no ta conta pa carnaval so, pero pa henter e aña. Y nos meta ta pa muchanan ta conciente cu nan ta bay un actividad y cu nan ta bay wordo expone na bebida, alcohol, presion di grupo; por mira den corant, den medionan di comunicacion, diferente situacion cu ta sosode, unda cu nan ta wordo expone na coi come, co’i bebe, despues nan no sa mes con nan a ‘end up’ eynan, y nos deseo ta pa nan ta un tiki mas conciente y cu nan no ta tuma tur loke nan wordo ofreci”, Yvonne Bermudez a subraya.
Tambe nan ta aconseha pa nan tin nan mesun placa pa cumpra nan cosnan, wak e amigonan cu ken nan ta cana, y wak kico ta nan intencionnan.
“Mayornan, papia papia cu boso yiunan kico ta norma y balornan, cu boso tin como famia. Kico bo ta verwacht como comportacion, den bistimento, y pa mayornan ta conciente cu nan ta e modelo pa nan yiunan. Pasobra nos kier, como adulto, duna un mensahe pa ‘no haci esaki, no haci esey’ pero bo como adulto ta haci diferente. Si nan kier pa nan comporta diferente, ban modela diferente”, Yvonne Bermudez a enfatiza.
