Bao tema: Ciudadnan Inteligente enfoca riba e hendenan
ORANJESTAD (AAN) Diabierna 31 di October a keda celebra na henter mundo, e Dia Internacional di e Ciudadnan, bao e tema “Ciudadnan Inteligente enfoca riba e hendenan”.
E tema aki ta busca mustra con e tumamento di decisionnan basa riba dato, tecnologia, y inteligencia artificial por wordo utiliza pa mehora e bida urbano y recupera for di e crisis actual. Tambe e celebracion di e dia aki ta pretende promove iniciativanan di indole local, y ademas cu enfoke riba salud. A tuma parti den e enfoke aki e Organizacion Panamericano di Salud (PAHO).
Observa e dia aki ta un oportunidad propicio pa destaca con e gobiernonan di cada pais ta aplica enfokenan innovado di gestion local, participacion social, y uso di evidencia pa fortalece e bienestar, ekidad, y resiliencia den nan comunidadnan.
Tambe ta un oportunidad pa visualiza e compromiso y resultadonan logra door di movimentonan regional, lanta unda ainda no ta existi Rednan di Ciudadnan (den e caso di Aruba di distrito y barionan) amicable cu e Adultonan Mayor, cu ta otro iniciativa di OPS, unda den exterior a inscribi mil municipio.
E obhetivo ta resalta e liderazgo di e ciudadnan (y municipio) den e innovacion social pa e construccion di ciudadnan saludabel, centra den e ser humano (e hendenan), articulando e agenda regional y e Red Global di Ciudadnan y Comunidadnan Amicable cu e Adultonan Mayor, cu e campaña Mundial di Nacionnan Uni cu a tuma lugar Diabierna ultimo, pero cu ta vigente tur dia.
E Asamblea General di Nacionnan Uni a proclama e Dia Internacional di e Ciudadnan na aña 2024. Kiermen 11 aña pasa. Na 2014, ONU Habitat a lanza un iniciativa yama October Urbano pa trece den relieve e desafionan urbano mundial y envolve e comunidad internacional den e desaroyo di un Agenda Urbano nobo, cu a keda aproba na October 2026 den e ciudad di Quito, durante e Conferencia Habitat III.
Durante e noticieronan di television na Canal Caracol di Colombia, por a mira cu hopi interes e desaroyo di diferente ciudad na Bogota, Medellín, Bucaramanga, entre otro, cu a abarca for di mantencion di limpieza te proyectonan grandi de desaroyo infrastructural, masha interesante mes.
Na Aruba, lo ta bon pa tambe duna interes na e celebracion aki, pa tene cuenta cu loke e ta nifica, y kizas cu lo forma gruponan di civismo comunitario, pa dirigi nos pasonan na haci di nos ciudadnan, specialmente Oranjestad y e Caya principal di San Nicolas, dos ciudad ehemplar, bunita, ordena y feliz, na prome lugar pa nos mes hendenan, y claro pa nos turismo.
