Segun Jayburtt Dijkhoff:
ORANJESTAD (AAN): Jayburtt Dijkhoff, a declara den entrevista cu DIARIO, pafo di Ministerio Publico, cu den un ultimo intento pa wak si e mecanismonan di democracia y ley ta funciona na Pais Aruba, basicamente, el a entrega e aangifte pa tres motibo.
E prome motibo ta basa riba e hecho cu dia cu el a haci denuncia publico, na lugar cu e minister (salud) a distingui weganan politico cu gobernacion a base di husticia y sano huicio, a opta pa ataca su persona, usando informacionnan di dje, como ambtenaar bao di dje, cu solamente e tin acceso na dje como minister, pa defende su mes publicamente.
Esey ta un hecho castigabel y pesey el a entrega e aangifte, pasobra den su funcion di minister el a haci un violacion di e ley concerni, loke ta un crimen, Dijkhoff a señala.
“Mi ta duna Ministerio Publico evidencia di esaki tambe, y siguientemente, e como minister tin acceso na tur data di tur personal, y tambe tin di haber cu Departamento di Recurso Humano, y na luga di proteha esaki, hustamente ta sake den publicidad. Por ehemplo, cu mi ta bay entrega retiro, cu tin un conflicto laboral, anto esey tambe ta un delito, cu mi a pone varios evidencia tambe na O.M. Y por ultimo mi a indica tambe cu tin abuso di su autoridad como minister. Y desde e dia cu mi a entrega e denuncia tambe, categoricamente mi a wordo saca for di Departamento di Salubridad Publico, y prohibi pa drenta cualkier edificio di DVG, por ehemplo Departamento di Infeccionnan, mi no ta traha na HoofdKantoor, mi no ta traha na Abattoir, anto pakico mi tin cu wordo prohibi pa drenta den e departamentonan aki? E no ta logico”, Dijkhoff a argumenta.
El a agrega cu tampoco e por papia cu su coleganan mas, e ta wordo completamente isola, anto na lugar di tin un investigacion cu ta cumpli cu Ley di L.M.A, cu ta Ley di Ambtenaar, pa e wordo scucha pa sigui e procesonan normal, e ta uza e metodo aki pa sake completamente afo, pa cumpli cu su strategianan politico. “Esaki ta un abuso y mi a duna OM tur e evidencianan. Mi a caba di haya mas carta di e minister tambe, cu berdaderamente esaki ta pa metanan politico, y no pa gobernacion a base di husticia”, Jayburtt Dijkhoff a enfatiza.
