ORANJESTAD (AAN): Conseho di Ministro di Reino y Conseho di Ministro riba Diabierna a bay di acuerdo cu nombramento di Hans Hoogervorst
como president di e tres Colegionan supervision financiero. Señor Hoogervorst ta sigui Lidewijde Ongering kende entrante 1 di februari ta stop como presidente.
Cu e nombramento di parti di Conseho di minister (di Reino), señor Hoogervorst ta bira entrante 1 di februari e presidente nobo di Cft Curaçao y Sint Maarten, Colegio Aruba supervision financiero y Cft Bonaire, Sint Eustatius y Saba. Hans Hoogervorst desde 2022 ta miembro di e 3 colegionan representando Hulanda. Hoogervorst tabata secretario di estado y minister den diferente gabinete Hulandes. Despues di su carera politico e tabata presidente di Autoridad Mercado Financiero y di International Accounting Standards Board.
Eddie van Marum, secretario di estado di Asuntonan Interno y Relacion di Reino tocante e nombramento: “Señor Hoogervorst ya tin un trayectoria solido como miembro di e Colegionan supervision financiero. E ta un excelente sucesor di señora Ongering kende desde februari 2023 a eherce e funcion aki cu gran profesionalismo. Finansa publico sano ta e base pa haci inversionnan cu mester condusi na un miho bida pa habitantenan di tur e islanan. Na nomber di Conseho di Ministro (di Reino) mi ta gradici presidente saliente señora Ongering pa su gran compromiso y esfuerso pa e partinan Caribense di Reino.”
Hans Hoogervorst: “Bou di guia di Lidewijde Ongering, nos como colegionan a dal pasonan importante den direccion di dialogo fortifica y mehoracion structural na e pais- (islanan).” Hoogervorst ta bisa cu e lo sigui e mes rumbo cu Ongering a scoge: “Mi ta spera un colaboracion fructifero cu e diferente pais- (islanan).”
E colegionan supervision financiero ta independiente y ta vigila solides di finansa publico di e paisnan Curaçao, Sint Maarten y Aruba y di e entidadnan publico Bonaire, Sint Eustatius y Saba. E colegionan tin un papel di señala y conseha.
