Dia Mundial di Turismo ta enfoca riba un turismo responsabel y sostenibel

Minister Dangui Oduber

*Cu ta beneficia futuro generacionnan 

ORANJESTAD (AAN):  Diabierna mainta Minister di Turismo y Salud Publico sr. Dangui Oduber a celebra “Dia Mundial di Turismo” conhuntamente cu tur partnernan y profesionalnan cu ta traha den turismo. Minister Dangui a hiba algun palabra cu su reflexion di tur locual turismo ta significa pa nos isla.

            Minister Dangui Oduber ta expresa cu turismo na Aruba no ta solamente stimula nos economia, pero tambe ta contribui di un manera significante na e bienestar social di Aruba. E ingreso nan genera di turismo ta yuda directamente pa sostene sector nan importante manera cuido di salud y fondo di pensioen, asegurando cu nos ciudadanonan ambos den e industria y pafor tin acceso na beneficionan esencial y asina sigurando un futuro cu calidad di bida halto.

            Minister Dangui su maneho ta basa ariba: 1. Trece e turista afluente y di calidad. 2. Crece Aruba cu un turismo sostenibel y responsabel. 3. Diversifica nos turismo innovando producto Aruba. 4. Haci inversionnan continuo den mehoracion di producto Aruba.

            Minister Oduber ta reafirma su compromiso pa mantene su vision y accion nan pa hasi Aruba su turismo sostenibel y responsabel. Hunto nos por traha pa preserva Aruba su bunita paisahenan, su tradicionnan y tur expresion cultural cu ta haci Aruba un destinacion realmente special. Door di adopta un maneho di turismo sostenibel, nos no solamente ta proteha nos isla pa generacionnan cu ta bin, pero tambe ta eleva calidad di bida pa tur hende cu ta biba ariba e dushi pida baranca aki.

            Finalmente, Minister Dangui Oduber ta desea Aruba un dushi Dia di Turismo Mundial yena cu inspiracion y determinacion nan nobo pa hunto nos sigui hiba nos pilar di nos economia dilanti. Alaves, Minister Oduber kier gradici henter e ekipo di Aruba Tourism Authority (ATA) pa un mainta ameno y ta yama danki na tur cu ta labora den turismo, esaki no ta posibel sin boso hospitalidad y servicio cu ta brinda na nos bishitantenan.

            Ban hunto sigui traha pa logra un turismo responsable y sostenibel, pa nos henter isla por sigui prospera den un manera cu ta beneficia futuro generacionnan.