CEO Tisa LaSorte:
*Aunke tin solucionnan chikito
ORANJESTAD (AAN) – No obstante cu a bin cu un maneho nobo pa personanan cu a bin biba na Aruba pero cu no tin permiso pa traha ainda, por haya permiso pa subi nos mercado laboral, esaki ta cambionan chikito cu no ta solucion e problema por completo.
Tisa LaSorte, CEO di Aruba Hotel & Tourism Association (AHATA), den entrevista cu DIARIO a señala, den entrevista cu DIARIO, cu e problema ta sigui aunke tur solucion chikito ta yuda, pasobra na Aruba no tin suficiente hende pa haci tur e trabaonan cu mester wordo haci.
CEO di AHATA a expresa cu e ta spera cu e gobierno cu ta bin na aña 2025 tambe ta mira e problema di escasez di trahado, y cu tambe lo yuda bin cu solucion.
“E no ta un problema facil pa soluciona, pasobra na Aruba ta sinti caba cu tin hopi hende residente caba, p’esey nos ta purba bin cu solucionnan di purba pone traha hende cu ta na Aruba caba, y tin cierto trabaonan cu no tin hende na Aruba pa haci esaki. Por ehemplo Executive Chef, Accountant, ta dificil pa haya na Aruba, y esey ta e tipo di trabao cu nos a pidi pa, den e maneho, por lo menos haci e proceso pa haya permiso, mas eficiente y mas cortico”, Tisa LaSorte a splica y a agrega cu esaki ta e tipo di solucionnan cu nan ta bin cu ne, pero cu ainda AHATA ta keda preocupa, pasobra ainda pa e problema no tin un solucion final.
