Lema 2023: “Inverti den nos planeta”
ORANJESTAD (AAN) – Dia 22 di April ta wordo celebra e Dia Internacional di e Mama Tera, proclama door di Nacionnan Uni na aña 2009.
E celebracion ta tumando lugar for di aña 1970, cu e meta di concientiza e humanidad tocante e problemanan genera pa e super-poblacion, e contaminacion, e conservacion di e biodiversidad, entre otro preocupacionnan ambiental cu ta existi.
En realidad e prome antecedente di e Dia di Mama Tera ta remonta na 1968, ora e Servicio di Salud Publico di Merca, a organiza e Simposio di Ecologia Humano, pa asina studiantenan di diferente lugar scucha cientificonan papia tocante e efectonan di e deterioro ambiental den e salud di hende.
Dos aña despues, na 1970, e senador y activista ambiental Gaylord Nelson a propone e creacion di un agencia ambiental, y a realiza un manifestacion masal na cual a asisti mas di dos mil universidad, miles di scol publico y algun centenar di comunidadnan.
E presion social aki a duna su resultado y e Gobierno di Merca a crea e Agencia di Proteccion Ambiental, y un serie di leynan destina na e proteccion di e medio ambiente.
Na 1972, a tuma lugar e prome conferencia internacional tocante e3 medio ambiente. Esta, E Cumbre di e Tera, na Stockholm, cual obhetivo tabata pa sensibiliza e lidernan mundial encuanto e magnitud di e problemanan ambiental.
Lema 2023: “Inverti den nos planeta”
E intencion ta pa Dia di Mama Tera 2023, bira e miho dia di Tera di tur tempo. Pa logra esey, e lema ta implica no solamente e gobiernonan, y empresanan di sector priva, sino tambe tur e ciudadanonan pa haci esfuerzonan pa logra un planeta berde y sostenible, cu por ofrece na e generacionnan nobo un oportunidad pa biba den un planeta saludable. Tur esaki, mester bin man den man di un economia berde cu ta promove practicanan medio ambiental cu ta respeta e planeta. Esaki ta e movimento medio ambiental mas grandi di mundo!
