Presidente di Parlamento mr. Edgard Vrolijk:
ORANJESTAD (AAN)—Presidente di Parlamento mr. Edgard Vrolijk, den un entrevista cu DIARIO a comenta cu e agenda pa 2023 ta bay lihe, y ya caba falta dos luna so pa recess.
El a expresa cu e ta satisfecho mirando cu no tin mucho ley atrasa mas, un par falta cu mester sincroniza cu e minister concerni, por ehemplo Minister Rocco Tjon tin un cla caba y otro cu mester bin for di Raad van Advies pa asina trata tur dos hunto, pasobra un tin di haber cu otro. Y tin algun ley chikito cu tin cu acomoda nan.
Pa April tin un reunion mas Dialuna otro siman, cu a wordo pidi pa Oposicion tocante costo di bida y esaki a wordo poni riba agenda. Na Mei tambe tin dos reunion riba agenda, uno ta comproba caba cu ta tocante Bejaardenhuis, y otro riba maneho di imigrante, pa cual Minister Croes tin cu duna Parlamento fecha ainda.
Vrolijk a indica cu unico ley mas grandi cu mester drenta ainda ta esun di belasting na frontera. Pues, en general tur cos ta den orden, y aworaki yenando e peticionnan di esnan di oposicion. Pero tur cos mester planifica y schedule, pasobra tin cu tene cuenta cu viahenan na Parlatino, y tambe cu e parlamentarionan cu ta afo, y cu e no tin gana di laga nan afo sin participa den reunion publico, y tambe mester tene cuenta cu esnan cu ta AO.
Tur esaki ta factornan cu probablemente lo tin un luna di Mei sin reunion di Parlamento, pasobra ya a acopla tur cos. E parti di quorum ta keda un reto pa e Presidente di Parlamento. Dialuna tabata tin un reunion cu e comerciantenan relaciona cu subsidio cu mester a pone den ley, y cu Vrolijk ta considere hopi importante y tabata tin 11 miembro di parlamento so den sala. Cu 11 miembro e reunion a bay. El a bisa cu si un reunion wordo yama sea cu oposicion of sin nan e ta haci e reunion pasobra ta 21 miembro di Parlamento tin, cu ta wordo paga pa ta presente den reunionnan publico.
E reunion di dialuna cu a pasa a sigui cu 11 parlamentario y e ley a pasa. El a remarca cu si e ta agenda un reunion cu 11 miembro cu e mester traha cu ne, e ta haci’e.
