Dia 4 di November tin“Onderwijs Congress 2024” pa tur docente di SKOA

Tur scol lo ta cera pa e dia aki

ORANJESTAD (AAN):  Desde aña 2018 SKOA a bin ta ofrece un dia di estudio na tur su docentenan pa asina por sigui traha riba e “Groei en Ontwikkeling” di su personal completo.

            Durante e dia di estudio aki ta ofrece diferente workshops na nos docentenan di Kleuter, Basisschool y Voortgezet.

            Pa e dia di estudio e aña aki, tin varios trainer di Hulanda y alabes e mesun “in-house professionals” cu lo ofrece diferente workshop na cada nivel di enseñansa. Nan stakeholders nan Fada, DVG & Departamento di Mucha y Hoben tambe lo haci nan presentacion ariba topiconan importante.

            Pa e Onderwijs Congress 2024 e Keynote speakers ta mr. Mauritsz de Kort, cu ta e Presidente di e “Gemeenschappelijk Hof van Justitie” na Corsou y Charlene Nectar cu ta un Coach for Performance, Strengths & Results.

            E aña aki e Onderwijs Congress 2024 lo tuma luga dialuna, 4 di November na Hilton Ballroom. Importante pa tur mayor tene na cuenta cu ariba e dia di estudio aki tur 46 scol di SKOA lo ta cera.

            Alabes cu ta organisa e Onderwijs Congress tur aña pa tur docente di SKOA, cada scol ariba nan mes tambe ta organisa internamente nan mesun dianan di estudio. Esaki ta pa percura cu cada miembro di e team di scol keda activo y ta alinea cu e metanan y vision den enseñansa di SKOA, nan scol y di pais Aruba.

            Un di e logronan di mas grandi cu tambe ta enfoca ariba e ampliacion di e conocemento di nos personal ta e programa di Erasmus Plus. SKOA desde 2023 ta e prome y unico schoolbestuur na Aruba y den Caribe cu ta oficialmente acredita pa Erasmus Plus. Cu e acreditacion aki tur nos personal ta haya e oportunidad pa bishita un pais cu ta cay bou di Union Europeo pa asina amplia nan conocemento profesional cu cursonan of job shadowing na nivel internacional.

            Cu e diferente actividadnan aki SKOA ta keda percura pa e 'Groei en Ontwikkeling' di su personal completo. Engradeciendo cada docente su conocemento riba nivel personal y tambe professional. E meta primordial pa keda pusha pa crecimento ta pa keda hisa e calidad di enseñansa cu nos ta brinda na nos muchanan.