ORANJESTAD (AAN): Veterinaire Dienst ta recorda tur persona cu kier sacrifica un cabrito, carne of porco pa consumo mester haci esaki na Abattoir.
Matamento di bestia na cas ta ilegal y por tin riesgonan pa salud di hende.
Tur hende cu kier haci uso di servicio di Abattoir pa sacrifica un bestia durante luna di November y December 2024 por haci esaki for di Dialuna te cu Diahuebs, parti mainta cuminsando dialuna 11 di november te cu Diaranson 18 di December 2024. Riba Diamars 14 di Januari 2025 abattoir lo ta operacional atrobe.
Alabes ta anuncia cu e proceso di sacrifica animal na Abattoir ta tuma luga abase di cita. Doñonan cu ta desea di sacrifica un of mas animal pa come mester percura pa yama di antemano pa confirma cu su persona ta desea di haci uso di e servicio di Abattoir. Esaki ta pa coordina e matansa na un manera mas structura, cumpliendo cu reglanan di higiena y e prevencion di transmision di Influenza y Corona.
Ta pidi encarecidamente pa trece animalnan na e ora duna conforme e cita. Si no bin na e horario palabra, lo mester haci un cita di nobo. Un recordatorio cu sin cita bo persona no lo por ricibi servicio.
Riba e mesun dia di matansa ta bay cu e carni despues di e pago na administration; abattoir no tin servicio di warda carni y no ta responsabel pa cu esaki. Tene na cuenta cu e ultimo dia pa mata bestia ta Diaranson 18 di December 2024 cu un capacidad limita; pues no warda te ultimo ora y traha bo cita di antemano.
Ban coopera hunto pa asina e proceso na Abattoir por bay na un manera planifica y trankil pa asina nos tur por pasa un bon fin di aña.
