ORANJESTAD(AAN): Diamars atardi durante un conferencia di prensa, Yvonne Lee-Perez di Directie Arbeid en Onderzoek (DAO) a anuncia cu nan dilanti di porta pa realiza un encuesta riba e forza laboral na Aruba.
Esaki ta di 11 aña consecutivo cu ta haci e encuesta aki pa haya sa con e forza laboral na Aruba ta desaroyando.
“E ultimo cu a tuma lugar den e forma aki tabata na 2018 y na 2019 a tuma lugar un pilot Census haci pa Centrale Bureau van Statistiek (CBS), mientras cu na 2020 a tuma lugar e Censo 2020”.
Na 2021 DAO, CBS y Banco Central ta uni forza un biaha mas pa colecta datonan necesario riba e forza laboral.
Nos a haci esaki den pasado y esaki ta un muestra cu nos mester sigui traha hunto pa ‘bundel’ nos conocimento hunto y tambe pa tene e gastonan mas abao posibel, segun Lee-Perez.
Un di e motibo pa midi e forza laboral ta e hecho cu esaki ta cifranan di desempleo y inactividad ta indicadornan hopi importante cu ta duna un bista di e desaroyo economico di Aruba.
Lee-Perez a splica cu pa e motibo aki ta hopi importante pa tene e encuesta di forza laboral 2021, pa por sigui e desaroyonan cu a tuma lugar den e mercado laboral desde Censo 2020.
“Nos kier gradici Gobierno cu ta mira e importancia di colecta datonan recien y ta duna e aprobacion pa nos sigui cu esaki”.
Esaki ta den linea cu e metanan sostenible (Sustainable Development Goals (SDG) ) cu a wordo aproba pa Nacionnan Uni y cu a wordo adapta pa Gobierno di Aruba tambe, segun Lee-Perez.
El a splica cu un parti hopi importante den realiza e 17 metanan aki ta pa tin datonan recien pa por traha y adapta maneho dirigi, factible y impactante.
Despues lo compara e resultadonan cu otro paisnan den nos region y tambe mundialmente.
Mirando e importancia di e datonan, e intencion ta pa midi e cifranan di desempleo mas frecuentemente, unda cu e intencion ta pa haci esaki cada cuartal.
“Esnan cu ricibi e invitacion pa yena e cuestionario di forza laboral 2021 lo wordo puntra pa nan cooperacion pa loke ta encuestanan di labor den futuro cu un frecuencia di 2 pa 4 biaha pa aña”.
E metodologia cu lo wordo uza, ta igual na esun cu a wordo uza pa Censo 2020, pues den forma digital y telefonicamente, segun Lee-Perez, kende a indica cu e encuesta aki ta mas cortico y ta mas dirigi riba cambionan den situacionnan laboral di e personanan.
