E “Djispi Franken Award”:
ORANJESTAD (AAN) – Den conferencia di prensa, Dialuna 29 di Augustus aki, señor Leo Vrolijk a duna informacion tocante e di 15 edicion di “E lens di mi wowonan”.
Vrolijk a señala cu esaki ta un proyecto cu a cuminza 17 aña pasa, pero debi na Covid-19 a keda dos aña cu no por a organize, pero e aña aki e evento ta bek, cu entre 15 pa 18 participante, cu un total di 125 potret.
E evento cu su exhibicion di potret lo tuma lugar na Biblioteca Nacional y e apertura ta Diahuebs 1 di September, y lo keda habri pa un luna.
Leo Vrolijk a expresa palabranan di gradicimento na señor Pierre Rafini, cu pa 15 aña ta sostene e proyecto aki. E ta un proyecto cu a cuminza y ta sigui, y ta dirigi specialmente na e fotografonan y durante e exposicion lo por mira potret trabaonan cu nan ta haci diariamente, y tin cu no a wordo publica prome, pero cu bunita shotnan.
Leo Vrolijk ta invita pueblo di Aruba pa pasa wak e exposicion despues di 2 di September cu ta habri pa publico, na BNA, durante oranan di oficina. Tambe tur mucha di school por bishita e exposicion aki.
E aña aki e evento ta dedica na Jason Inesia y tambe na Rudolf Haseth y nan ta wordo reconoci. Desde 2019 e premio ta carga e nomber di Djispi Franken Award. E aña aki a wordo dedica na Andrew Vrolijk di Tele-Aruba. Leo Vrolijk a expresa cu asina nos hendenan ta wordo reconoci segun añanan ta bayendo. Generalmente, e ta dedica e premio na tres fotografo pa aña, y ainda tin un lista largo pa bin.
