Archivo Nacional Aruba a haya documentonan relaciona cu Aviacion na Aruba

ORANJESTAD (AAN): Diabierna ultimo Archivo Nacional Aruba a haya bishita di sr. Agustin Vrolijjk,

kende den cuadro di nan campaña di 3C, esta Colecta, Conoce y Conserva a haci entrega di documentacion valioso cu durante su carera riba tereno di aviacion civil a colecta tocante aviacion na Aruba.

            Sr. Vrolijk ta hurista specialisa den leynan di transporte areo, tabata director interino di Direccion di Aviacion Civil y tambe  director di Buitenlandse Betrekkingen aki na Aruba. Actualmente sr. Vrolijk tin e funcion di Gobernador Suplente di Aruba y como ciudadano el a haci e acto aki di entrega di documentacion tocante aviacion.

            Interesante ta den e documentacion cu sr. Vrolijk a entrega ta cu tin parti di historia documenta di nos prome compania di aviacion di Aruba. E prome vuelo comercial pa Corsou a tuma lugar riba 28 di augustus 1934, pues 88 aña pasa. Esaki a wordo realisa door a di Caribbean Flying Service N.V., di sr. Manuel Viana. Hunto cu  sr. James Madison Massey na aña 1932 a haci peticion na Gobernador di Colonia Corsou pa permiti e compania haci vuelonan cu avion di un of dos pasahero entre Aruba y Corsou y tambe pa cuminsa un scol pa pilotonan.

            Sr. Viana tabata e conocido negoshante den autonan aki na Aruba, esta di Viana Auto Supply na San Nicolas.

            Hopi tabata e desafionan encontra, tanto pa loke ta trata permisonan y tambe forma di pensa di parti di autoridadnan di gobierno di Colonia Corsou. Posiblemente den e caso aki e dos desaroyo importante tabata influencia e relacion pa cu instancianan oficial entre e gobiernonan di Aruba y di Colonia Corsou, esta e deseo pa un separacion for di Corsou di un banda y e progreso economico.

            Pa un tempo e bay bin di peticion a termina y ta te na februari 1934 cu Gezaghebber di Aruba a manda un carta cu concepto di statutonan y actonan di Caribbean Flying Service N.V. pa  Gobernador di Colonia Corsou. Participantenan den e compania aki tabata sres. Adolf Theodoor Dirk Helenus de Boer, Gustaaf Adolf Kuiperi y Manuel Viana, tur comerciantenan di Aruba. Dia 26 di februari 1934 Gobernador ta aproba e cocepto di e statutonan, pa asina e aerolinea keda lanta. Mientras tanto e compania a pidi Gobernador permiso pa opera un avion amfibio pa bula riba Corsou y mas despues pa ciudadnan costero di paisnan bisiña.

            Tur esaki nos por lesa den e articulo di sr. Agustin Vrolijk, “The First Commercial Airline of Aruba. A Chronicle of the Caribbean Flying Service N.V, according to the correspondence between the Government of Aruba and the Central Government in Curaçao.”.

            Riba 28 di augustus 1934 a tuma lugar e prome vuelo comercial pa Corsou y na e ocasion ey tabata tin e envelopnan di prome edicion cu a wordo manda Corsou, cu awor Archivo Nacional Aruba a haya un di nan.

            E frecuencia di vuelo tabata di 2 pa 3 biaha pa siman. E capitan-piloto tabata Adolph Joseph Viccellio mientras co-pilotonan tabata e studiante pilotonan.

            Debi na e situacion di e tereno di aterisahe na Savaneta (net pabou di e tereno di Lago) den oktober di mesun aña varios vuelonan mester a wordo cancela of bulafor di schedule. Esaki pa motibo cu e tereno ta yena cu awa di lama ora lama hisa.

            Binimento di KLM cu a cuminsa bula 22 di december 1934 (SNIP) a causa tambe cu e vuelonan di Caribbean Flying Service mester a wordo cancela. Esaki pasobra cu e condicion pa operacion tabata cu ora KLM bini CFS mester cancela su operacion. Asina tambe a informa Gobernador di e situacion y na februari 1935 a revoca e concesion duna na Flying Service N.V.

            Despues cu sr. Viana a purba na bende su avion cu KLM y esaki ni a reacciona, nan a hayanan ta desmentala esaki y manda e motor Merca.

            Gobierno na Corsou a tambe conseho pa no paga CFS pa e infrastructura cu nan a traha. Pa hopi aña e propeller a dorna e club di Aruba Flying Club na De Vuyst, San Nicolas.

            Asina aki, e cronica di e compania Caribbean Flying Service a termina sin ningun gloria. Manera sr. Vrolijk ta pone na final, sigur un mihor aprecio tabata na su lugar ya cu el a contribui na exito di KLM dor di tabata e prome compania di Aruba cu a laga e publico cera conoci cu transporte aereo.

            Archivo Nacional kier a gradici sr. Agustin Vrolijk pa e bunita gesto aki y e articulo di sr. Vrolijk ta accesible via e siguiente link:

https://archive.org/details/caribbean-flying-service