Anthony Rojer, director di Utilities:
ORANJESTAD (AAN) – Anthony Rojer, Director di Utilities, tambe a hiba palabra durante e conferencia di prensa, den cual Minister Glenbert Croes a haci anuncio oficial di e construccion di e di dos parke di molina di biento.
“Nos ta den un lucha pa combati e emision, y purba salba e planeta y biba den un ambiente mas limpi” Anthony Rojer a acentua.
Pa medio di slides el a ilustra cuanto porcentahe nos planta nacional di awa y electricidad ta produci na emision. Su contribucion ta 60% di e total di 100%. Ta bin acerca e sector di transporte, e autonan cu ta core riba caminda; gasolin y diesel cu ta contribui cu 27% di emision. “Hopi biaha nos ta lubida nos landfields: Parkietenbos ta contribui cu 10% di emision, cu ta 100% di e emision cu ta wordo emiti aki na Aruba. Esaki ta cu e molinanan di Vader Piet caba. Kiermen, nos mester haci algo pa combati esaki”, Rojer a señala.
El a señala cu si wak cuanto emision ta wordo genera individualmente, pa persona aki na Aruba, e ta ekivalente na 9.3%.
Comparando Aruba cu paisnan industrial, Director di Utilities a splica cu emision na Merca ta 15% per capita. Hulanda ta 9.9%, Japon: 9.5%, Alemania, 8.9%. Aruba ta 9.9 siendo cu su unico pilar economico ta turismo. Pues, Aruba mester cuminza un caminda pa haci algo, pasobra si haci nada, e ta bay afecta henter nos poblacion.
El a menciona cu nan a haci diferente estudio pa bin cu un master plan, con pa mitiga e situacion aki. Na aña 2019 nos a haci un estudio previo pa un master plan pa Aruba su energia. “Despues di e resultadonan ey, na 2020 nos a sinta hunto como grupo (Utilities Aruba, WEB y ELMAR) den sesionnan y haci diferente ehercicionan, y nos por bisa cu e resultado di e estudionan aki, despues cu e acuerdo cu Eagle LNG, nos a yega na un maximo cu e capacidad di biento nobo cu por wordo instala ta 65 megawatt pa e ta optimal. Solar 15 megawatt, y bateria 20 megawatt. Tur esaki ta e ‘renew energy mix’ cu cual nos ta bay reduci nos emision cu 64%”, señor Anthony Rojer a comenta.
{gallery}Aruba mester haci algo pa mitiga e emision di CO2, si haci nada e lo afecta henter nos poblacion{/gallery}
