Dia 1 di November 1991 Costa Linda a yama nan prome bishitante bonbini

Recordando un momento special

ORANJESTAD (AAN): E november aki, Costa Linda Beach Resort ta alcansa un momento special: 35 aña desde cu nan a duna su prome bishitante bonbini dia 1 di november 1991. Situa na Punta Brabo, na cuminsamento di Eagle Beach, Costa Linda a bira un parti familiar y hopi stima di e historia di timeshare na Aruba.

E resort a keda desaroya pa Raymond Maduro, un di e pioneronan cu a yuda introduci y establece timeshare na Aruba. Den e epoca ey, timeshare di luho ainda tabata un concepto relativamente nobo riba nos isla. E idea di ta doño di un lugar den Caribe pa regresa aña tras aña eventualmente lo a bira un parti importante di e industria turistico di Aruba.

Pero, e legado di un resort ta bay mas leu cu su ubicacion y facilidadnan. Ta e hendenan cu ta haci’e special. Costa Linda tin un tradicion largo di reconoce e dedicacion di empleadonan cu a pasa decadanan atendiendo doñonan di timeshare y bishitantenan, algun di nan desde e prome añanan di e resort.

Su structura di propiedad tambe ta distingui e resort: Costa Linda ta propiedad di, y ta goberna pa un asociacion cooperativo forma pa su doñonan di timeshare.

Mientras Costa Linda ta acerca su di 35 aniversario, e ta celebra mucho mas cu e paso di tempo. E ta celebra e encanto duradero di regresa na un lugar familiar, bolbe encontra cu amigonan y famia, y crea recuerdonan nobo riba One Happy Island.