Colegio di Hefenan di Polis di Caribe Hulandes
ORANJESTAD (AAN): Informacion for di Santo Domingo, ta indica cu mas di cuarenta analista y specialista riba tereno di criminologia di aproximadamente binti pais y isla di Caribe a bini hunto na Santo Domingo pa e di tres encuentro regional ‘Regionale Netwerkbijeencomst voor Analisten’ (RNA), e aña aki cu e tema “Strategic Insights: Criminal Networks, Financial Crime, Drug Flow and the role of A.I.”
Colegio di Hefenan di Polis di e cuater cuerponan den Caribe Hulandes a organiza e encuentro cu e meta di fomenta cooperacion regional den e lucha contra crimen transfronteriso.
Apertura di e encuentro tabata na encargo di Leonne van Vlimmeren, embahador suplente di Reino Hulandes pa Republica Dominicana; vicealmirante Jose Manuel Cabrera Ulloa, hefe di Direccion Nacional de Control de Drogas (DNCD); y Raymond Ellis, hefe di polis di Curaçao y representante di Colegio di Hefenan di Polis. Van Vlimmeren a referi na RNA como “un foro unico caminda analista por siña conoce otro miho, reconoce cierto patronchi y duna otro sosten transfronteriso.” Cabrera Ulloa a mustra riba e echo cu crimen organiza ta move rapidamente di un pais pa otro y cu ‘nos reaccion mester ta coordina, bon fundamenta y basa riba informacion cu nos ta intercambia cu otro.’ Ellis a agrega na esaki bisando: ‘Analista ta combina informacion los pa duna un bista cla. Ora e analistanan di diferente isla traha hunto, e rednan criminal ta perde un di nan bentahanan di mas importante: fragmentacion.’
Durante tres dia, e analistanan di Anguilla, Antigua & Barbuda, Aruba, Bonaire, Curaçao, Francia, Guyana, Hulanda, Islanan Caiman, Jamaica, Republica Dominicana, St. Martin, St. Maarten, St. Lucia, Suriname, Trinidad & Tobago, US Virgin Islands y Virgin Islands Britanico a presenta nan ultimo analisisnan. Hunto, tur e contribucionnan aki a duna un bista amplio y detaya di criminalidad den nos region: tiroteo, cifra di asesinato, trafico di droga, violencia hubenil, uzo di zona vulnerabel na costa, cooperacion entre e rednan di diferente isla, crimen cibernetico y e rol cada bes mas importante di Inteligencia Artificial (IA) y plataforma online.
Tabatin tambe algun contribucion cu a yuda contextualisa e desaroyonan aki den un perspectiva mas amplio. Dr. Evan Ellis a describi con cambio geopolitico ta afecta region di Caribe di manera cu, mas y mas, nos region no ta solamente un ruta di transito sino mas bien parti di e cadena logistico di cocaina y otro mercancia ilegal. E expertonan di Global Initiative Against Transnational Organized Crime (GI-TOC) a mustra con Caribe a desaroya pa bira un plataforma pa almacena, re-empaketa y redistribui cocaina, y a enfatisa e relacion cu tin entre traficacion di droga y arma di candela.
E rol di tecnologia y inteligencia a bini padilanti den e contribucionnan di John Bloebaum y Thom Snaphaan. Nan a mustra cu, pa por haci analisis di calidad, mester formula e preguntanan operativo na un manera skerpi, y cu “financial crime scripting” ta yuda detecta operacion di labamento di placa y fraude.
Assistant Commissioner Leonardo Brown, hefe di departamento tecnologico di Jamaica Constabulary Force (JFC), a haci un presentacion riba desaroyo di recurso digital den JCF. Representando CARICOM IMPACS, Terrance Roopchan, hefe di e unidad di inteligencia contra crimen, arma di candela y gang y di e unidad di apoyo operacional di Regional Intelligence Fusion Centre, y Dale Joseph, analista hefe di Cyber Fusion Unit, a trata e tendencianan actual cu por mira den traficacion di arma di candela, formacion di gang y crimen cibernetico. Angelo Brete, hefe di FIU Aruba, a presenta un perspectiva financiero, mustrando con transaccion poco usual ta yuda identifica labamento di placa den varios sector, manera di real estate, wega di placa, comercio internacional y mas.
E encuentro tabatin un mensahe central masha cla: Menaza regional ta pidi un acercamento regional. E analistanan ta mira con facil arma di candela ta move di un isla pa otro, con medionan social ta yuda grupo hubenil riba diferente isla drenta den contacto cu otro, con e rutanan di droga ta cambia rapidamente ora presion oumenta y con criminalidad ta probecha di e buraconan cu tin den e colaboracion. RNA ta yuda sera e buraconan aki, reforsando e contactonan personal, agilisando comunicacion, dunando mas acceso na e metodonan analitico cu ta disponibel y dunando un y tur un bista di e patronchinan cu ta desaroyando.
Colegio di Hefenan di Polis a cera e encuentro reafirmando cu lo sigui desaroya RNA como plataforma regional anual. Manera CARICOM IMPACS a expresa: “Colaboracion no ta costa nada, fragmentacion si.” E edicion di 2026 tambe lo worde organiza den colaboracion estrecho cu e partnernan di nos region.
