ORANJESTAD (AAN): Sharline Koolman, di Departamento di Salud a indica durante e rueda di prensa extraordinario di Crisis Team Covid-19
cu e cluster medico ta keda wak e cifranan y datonan di casonan positivo pa asina analisa ki ora ta introduci of flexibilisa e medidanan.
Aworaki tin otro parametro di nan ta uza cu ta e parti di vacunacion. Ora di pone tur esaki banda di otro ta mira cu en principio tin cu cuminsa flexibilisa cierto medidanan pasobra no por hustifica esakinan mas pa loke ta e parti medico, a splica.
Tur dia ta wak e cifranan di cerca y tambe ta keda evalua con e proceso di vacunacion ta canando, banda di e casonan positivo, banda di e situacion na Hospital y a base di esey tin un bista riba e cifranan y si acaso ta constata cu tin un tendencia cu no ta bayendo bon, principalmente riba e 'positivity rate', e ora lo informa esaki na Crisis Team y pa tuma e medidanan cu mester wordo tuma, Koolman a duna di conoce.
El a agrega cu di parti di cluster medico ta spera cu esaki no ta necesario. DVG ta hopi contento cu e resultadonan di e vacunathon II y con comunidad a scucha e yamada, a remarca.
