Di e forma aki Stephen Diaz a despidi di Caribbean Combo y di su publico

ORANJESTAD (AAN): Den e sala di exposicion di Cas di Cultura, e artista musico Arubano Stephen Diaz

a presenta dilanti di un publico di amigo-, famia- y fanaticonan. Esaki ta temporalmente e ultimo concierto cu e musico a duna prome cu el a bay sigui su estudionan na Merca.

   Cu sentimentonan di aprecio,  Stephen a  introduci e miembronan di e banda Caribbean Combo cua tabata e prome ensamble cu el a join na 2014.  E ta e prome drummer di Caribbean Combo.   “Den musica, bo no por gaña. Ta un lifestyle esaki ta. Mi a cuminsa cu nan y mi ta gradicinan tambe pa semper”.

   Durante di e concierto, Stephen a gradici entre otro su maestro Carlos Bislip pa semper kere den dje y gui’e na exito. Tambe su compañeronan di e banda Caribbean Combo, esta Franklin Granadillo, Alejandro Gonzalez Lujan, Ivan Williams, Denzil Tromp, Ivan Quandus, Andrew Webb y sigur esun mas hoben esta Elai Wester. Tambe Bryan Solognier, Kevin y Elton di Cas di Cultura el a gradici. E anochi tabata acompaña pa cancionnan di ritmo tropical, samba, balada, Jazz y calypso. Algun tema presenta tabata Mambo influenciado, Donaly, Tenderly, Triste, Bilongo y Dubious.

   Stephen lo ta studiando na Universidad di Louisiana na Monroe pa su bachelor di arte y musica pa 4 aña. Despues e ta continua su master cu ta 2 aña.

   Tur presente a gosa di e concierto y a desea Stephen, hopi exito na Louisiana.

   E articulo aki pa cortesia di Addonsito Croes.