ORANJESTAD (AAN) – Director di AZV, Ir. Edwin Jacobs, den conferencia di prensa den cual el a elabora tocante e cantidad di aseguradonan cu nan ta mandando pa exterior.
Actualmente, AZV ta na un promedio di mas of menos 45 pa 50 pashent pa luna cu ta wordo manda na Colombia, pa ricibi cuido specializa.
Jacobs a indica cu e Institutonan Hospitalario Medico, cu AZV ta contrata na Colombia, pa cuido medico, ta Fundacion Santa Fe de Bogota, mas tanto pa hospitalizacionnan cu ta rekeri di specializacionnan hopi profundo, unda en principio e pashent mester bay Hulanda. 39% di e pashentnan aki ta bay na e Clinica aki. Tambe Hospital Internacional di Colombia, situa na Bucaramanga, y despues ta bin Valle de Lili na Cali y Fundacion Cardiovascular, na Bucaramanga.
Jacobs a reitera cu esaki ta e cuater hospitalnan cu el a bishita durante su estadia na Colombia.
“Si mira e specialismo pa cual nos ta manda nos pashentnan afo, nos ta manda hopi biaha pa onderzoek, MRI diferente na esun cu nos tin na Aruba, y pa diferente otro investigacion cu aki na Aruba nos no tin e aparatonan pa haci esaki. Nos a manda diferente hende tambe pa wowo, vooral na momento cu ImSan tabata tin e problema di huma, cu a cera e sala di operacion pa un cantidad di siman, Casonan di urgencia y tambe di complicacion di wowo tambe ta keda manda na Bucaramanga”, Edwin Jacobs a señala.
Jacobs a agrega tambe casonan di ortopedia cu ta bay mas tanto Bogota. Tambe Neurosurgery sigui pa operacion di curazon y Urologia, unda 32 caso a bay Santa Fe de Bogota, cu ta e centro di experticia cu AZV ta uza unda tambe tin e Robot Erasmus, pa haci operacionnan hopi sigur.
Director di AZV a menciona cu nan a constata tres bottleneck cu mester bay traha riba nan. Uno ta e periodo di estadia pa cuminza e tratamento definitivo. “Nos a constata 1: cu tin cierto wardamento cu ta tuma lugar na Colombia, y esey ta irita nos aseguradonan, cu ta sinta den un camber di hotel ta warda nan afspraaknan, loke no ta nada agradable”, Jacobs a indica.
El a bisa si, cu ora e pashent yega Colombia, den e prome dos dianan e ta haya su prome cita. Pero den etapa cu ta sigui ta unda tin espacio pa mehora y tin miho coordinacion. AZV por bay haci mas poco posible, e tempo entre e diferente citanan.
E di dos punto cu AZV mester bay traha riba dje ta e satisfaccion di e pashent. “Akinan tin mas espacio pa mehora y duna satisfaccion na e pashent. Nos ta bay cuminza tambe cu un encuesta bao di esnan cu ta termina nan tratamento, pa nos wak unda tin mas espacio pa mehoracion, y esaki ta partinan tambe cu nos ta bay tuma den e contrato cu proximamente nos ta bay bin nobo cune”, Director di AZV, Edwin Jacobs a duna di conoce.
