Di e forma aki Art Is Fun Foundation a clausura aña escolar

Exhibicion di nos muchanan dedica na e grandinan di impresionismo

ORANJESTAD (AAN): Diasabra merdia a tuma luga na espacio di Ritz Carlton un exposicion sumamente dinamico. Organiza pa Art Is Fun Foundation, e evento ta marca e fin di e aña escolar 2022-2023 exponiendo asina e creaccionnan di nan alumno. E obranan a enfoca riba e estilo di impresionismo, rindiendo homenahe na maestro di impresionismo manera Monet, Degas y e post impresionista Van Gogh.

   Maria Magdalena Gonzalez di Art Is Fun a splica cu nan ta un movemento artistico cultural cu a lanta cu e obhetivo di un vision integral di arte na Aruba. Nan ta kere cu arte mester ta mes normal cu siña mara sapato of skeiro djente. Hopi mucha ta cuminsa siña pinta fo’i mucha cu nan man of cu cuashi y eynan caba por ripara su talento potencial; pero tur mucha mester por tin e oportunidad di desaroya nan talento.

   Art Is Fun Foundation ta traha a traves di un programa di introduccion caminda ta mustra na e muchanan tur color, herment, textura y superficie cu por traha cu ne, mustrando asina cu tin hopi manera di expresa arte; cada un for di su punto di bista personal. “E wowo ta capta y e man ta traduci,” asina Gonzalez ta bisa, añadiendo cu “talento tin ta nace cu ne, mientras cu otro por siña.”

   E meta di e fundacion ta pa mucha conoce arte en general, e arte di e pais y hunto cu ne e cultura y humanidad di nos isla y di mundo. Nan ta ofrece les na mucha cuminsando ya caba for di 3 aña di edad pa medio di tecnica simpel y pret. Tin un variedad di programa bayendo for di e inicial, regular den tres nivel, tayer di diferente estilo manera pop, abstracto y retratismo, entre otro, pero tambe di artenan moderno manera anime, design, video y fotografia.

   Fuera di e programa cu a caba di cera y cu ta core pareu cu aña escolar, tin otro opcion manera pa mucha cu necesidad special, pa persona di tercer edad, pa turista, pa grupo, famia, etc. Pa mas informacion por tuma contacto a traves di nan pagina di Facebook cu yama Art Is Fun Aruba.

   E fundacion ta gradici Ritz Carlton pa brinda e espacio pa e exhibicion, mescos cu na famia Abduhallab, Adriana Celeste di Empower Art Dance Academy cu tambe a forma parti di e exhibicion, na henter e ekipo di Art Is Fun Foundation y na Prins Bernhardfonds.