Di dos grupo di 62 studiante a yega Hulanda

ORANJESTAD (AAN)/Den Haag  – Cu vuelo 769  di KLM a yega diaranson 3 di augustus un cantidad di 62 studiante arubiano

pa sigui un estudio avansa na nivel di HBO of Universidad na Hulanda. Esaki ta e di dos y ultimo vuelo cu studiante cu ta yega Hulanda. Ta trata aki di studiantenan cu ta bai studia na Utrecht, Amsterdam, Breda, Tilburg, Den Haag, Delft y Leiden.

            Na Schiphol e studiantenan mescos cu tabata e caso ayera a wordo saluda Minister Plenipotenciario Suplente mr. Ady Thijsen. Un biaha mas tabata tin un delegacion consistiendo functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.

            Mescos cu tabata e caso ayera, a dura bastante largo prome cu e studiantenan por a piki nan maleta pa asina sali pafor di e sala di yegada. Akinan na un forma bon coordina y organisa a haya instruccion di personal di Arubahuis, mentornan y miembronan di e POC con pa cana y unda nan mester a para den grupo pa warda nan turno pa bai na e bus cu lo hiba nan na nan ciudad di estudio. Ariba e di dos dia tanto e programa Leu foi Cas, un ekipo di Telearuba y Roy Kelly di e website Arubiano.eu a haci grabacionnan y a tuma potret di e yegada.

            Awe e grupo aki di studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

E prome aña e studiante ta ricibi guia di e studiementor, pero pa e resto di su estudio e ta cai bou di Arubahuis.

            Riba e Facebook pagina di Arubahuis y Onderwijszaken lo tin potret y videonan di e yegada di e grupo di studiantenan.

Potretnan ta cortesia di Arubahuis