Minister Plenipotenciario Suplente mr. Ady Thijsen:
ORANJESTAD (AAN)/Den Haag – Minister Plenipotenciario Suplente Ady Thijsen ta sumamente contento di por a ricibi e prome grupo di studiante di Aruba cu a bay continua cu nan estudio na Hulanda. Conhuntamente cu Prome Minister di Aruba Evelyn Wever-Croes, team di Arubahuis, mentornan y hopi studiante den e “Plaatselijke Opvangcommissie”, a duna e studiantenan un caluroso bon bini y a desea nan exito pa nan logra nan metanan.
‘Nos ta hopi contento cu nos por a ricibi nos studiantenan y cu nos por tey pa sostene nan y guia nan den nan meta.’ Minister Thijsen a expresa cu tur aña e ta algo grandi ora cu studiantenan ta biaha pa continua cu nan estudio, pasobra nan ta persigui nan meta y despues nan por contribui na nos pais.
Na yegada di e studiantenan na Schiphol, e tabata bunita pa mira e grupo di studiante cu ta den “Plaatselijke Opvangcommissie” di diferente ciudad entre otro Nijmegen, Groningen, Leeuwarden, Tilburg, Rotterdam, Amsterdam y Arnhem, ricibi e studiantenan.
“Como conseho na e studiantenan mi ta bisa, pone bo meta bo dilanti, studia na un manera responsabel pero semper combine cu e parti social. E ta bon pa bo participa den e comunidad Hulandes, pero balanse y no haci di mas. Mi ta kere si bo haci esey, bo ta logra sigur,” Minister Thijsen a expresa.
Por ultimo, Minister Thijsen ta recorda studiantenan cu Arubahuis tey pa sostene nan den cualkier reto cu por presenta y cu nan por acerca Arubahuis pa busca cualkier solucion. Tambe ta gradici tur mentor y tur esnan cu a yuda ricibi e studiantenan y cu despues lo sigui guia nan tambe.
Potret ta cortesia di Arubahuis
