2025 ta acerca su ultimo trimester cu tension cu por afecta Aruba
- Confrontacion Merca y Nicolas Maduro den porta di Aruba
- NATO ta acusa Rusia na Nacionnan Uni di a provoca Union Europeo
ORANJESTAD (AAN) Uno di e topiconan continuo di DIARIO durante ultimo añanan, tabata e forma cu conflictonan y problemanan mundial, por tin efecto pa Reino y pa Aruba tambe.
DIARIO hasta a trece dilanti cu mester tin informacion adecuado na Pueblo di Aruba ariba tur tereno mientras cu e dependencia di Aruba ariba desaroyonan externo, ta nifica cu e Pueblo mester worde bon informa ariba tur resultado cu por spera.
Mientras September ta yega na su fin, Aruba ta prepara pa e entrada di e ultimo tremester di 2025, cu ta luna di October, cu generalmente ariba tereno climatologico por trece sorpresa mientras e ta e luna cu porta ta habri pa temporada di fiesta y preparacion directo pa e temporada halto di turismo.
DIARIO semper a indica cu ora papia di turismo, ta papia di un ramo economico cu ta exigi un grado halto di responsabilidad pa bienestar di e turista ariba tur tereno cu por tin influencia ariba bienestar di hende na un forma of otro.
Mientras e bienestar y seguridad di e Arubiano como ciudadano Hulandes y Aruba como teritorio Hulandes ta asunto di Reino, mas informacion ariba tur loke por afecta e bienestar di e Arubiano, mester haya mas claridad den un situacion mundial y regional dificil pa Hulanda como parti di Union Europeo y pa Aruba como parti di Region di Caribe, den porta di Venezuela.
Na e momentonan aki guia di e Arubiano ta necesario den suspenso international serio pa Reino tanto na Europa como den region di Caribe.
Directamente den porta di Aruba, un confrontacion entre Merca y Nicolas Maduro ta sigui crece den cual acusacionnan serio ta cay y den cual tambe amenazanan serio ta papia di un relacion entre dos pais, cu hopi tempo tin problema cu otro.
Aruba como pais di Reino Hulandes, pues teritorio Hulandes, sigur mester ta na haltura di sucesonan teniendo cuenta cu e hecho cu relacionnan entre Hulanda como parti di Europa y Venezuela, no ta bon.
Na mes momento e relacionnan directo y influencia di Rusia ariba Nicolas Maduro ta conoci, na un momento cu Hulanda como parti di Union Europeo y NATO ta confronta e agresion Ruso, cu nan a denuncia na Nacionnan Uni!
Na e momentonan aki un situacion sumamente serio ta presenta su mes, den un confrontacion entre Nicolas Maduro y e Presidente Americano Donald Trump, cu ta dirigi Merca, cu ta e mercado turistico mas grandi di Aruba y manera cifranan ta mustra ta decisivo pa bienestar economico di Aruba sigur den porta di e temporada di turismo.
Merca ta acusa Nicolas Maduro di asuntonan sumamente serio despues cu ta worde reclama cu Merca a destrui barco di contrabanda den droga.
Mientras den porta di Aruba, un conflicto internacional den cual e Presidente di e pais di cual economia di Aruba di Aruba ta depende, ta tuma lugar, na Europa por tuma nota con Hulanda como miembro di NATO, den un forma historico tabata parti di e acusacionnan contra Rusia, cu interes poderoso na Venezuela, den reunion di Nacionnan Uni.
Rusia ta worde acusa di viola e espacio di aviacion na Estonio y Polonia, parti di Nacionnan Uni , loke ta nifica cu Rusia a crea e riesgo di un confrontacion arma cu paisnan di Union Europeo di cual Hulanda, miembro di Reino Hulandes, tambe ta forma parti mientras Aruba como parti di Reino Hulandes tambe tin beneficio.
Aruba mester worde bon informa di un situacion mundial den porta di Aruba y e resultado cu e desaroyonan por tin pa Aruba y den e caso di Venezuela pa economia di Aruba directamente.
DIARIO ta den contacto directo cu expertonan na momento cu Pueblo di Aruba mester ta bon informa di suspenso internacional den seno di Reino y den porta di Aruba, den cual e Presidente di e partner economico mas importante di Aruba ta confronta Venezuela.
Ta cu acusacion serio di droga Presidente Donald Trump ta confronta Nicolas Maduro den porta di Aruba, cu un economia cu ta depende di ingreso Mericano, na vispera di temporada halto di turismo na Aruba!
