ORANJESTAD (AAN): Durante e recien concierto di Dhaddy Brokke y Tony Sherman como duo,
den cual a presenta nan exitonan nostalgico cu pa decadas a zona den mayoria hogar den Antiyas Hulandes, Prome Minister mr. Mike Eman, den su capacidad como minister di cultura, a rindi homenahe na e duo aki.
E anochi aki tabata un anochi special mirando cu esaki tabata e ultimo oportunidad pa goza di e duo aki den concierto y publico a sa di respalda grandemente pa hunto, canta e cancionnan cu mayoria a lanta cu ne durante nan infancia.
No ta facil pa organiza un evento asina grandi mirando cu ambos cantante tin nan agenda yena cu presentacion. Pa reconoce e exitonan grandi di e duo aki, Prome Minister Eman a duna Dhaddy y Tony un plakaat bon mereci pa nan produccionnan cu a sa di alegra curason di e comunidad Antiyano cu cancionnan di pasco, dia di mama y baladanan inolvidabel. Cu e plakaat aki, Premier Eman a reconoce Dhaddy y Tony como baluarte nacional y a desea pa wak mas di ambos artista hunto den futuro.
"Dhaddy y Tony por worde considera como parti di e alma y curason di e pais aki", Prome Minister Eman a bisa den su discurso.
