ORANJESTAD (AAN): Informacion hopi interesante a bin for di Colombia, unda cu despues di un investigacion, autoridad a gara algun agente Policial,
cu ta meti den narcotrafico y tabata responsable pa manda hopi droga via contrabando rumbo pa Hulanda.
E siman aki, e detencion a tuma lugar na e ciudadnan di Bogota, Apartadó, y tambe na Turbo. En total a aresta cinco persona, di cual tres di nan ta agente policial. E grupo aki ta activo den Golfo de Urabá, cu ta keda na e parti panort di Colombia, net na e skina cu Panama.
Nan ta esnan cu den ultimo añanan, a sa di manda varios cargamento rumbo pa Rotterdam y Antwerpen (Belgica), cu a suma na 8.000 kilo di cocaina.
E droga aki tabata wordo scondi mey-mey di cargamento di bacoba den container. Den pasado pa e cargamentonan ey, a yega di detene hende caba.
Entre e tres agentenan policial cu a keda deteni, tin Inspector Heyler Sánchez Mosquera di Apartadó. E ta esun cu ta dirigi e grupo. E dos otro agentenan ta miembro di Policia Nacional. Ora cu a bay tene razzia na nan cas, a bin haya suma masha grandi mes di placa cash, esta 220 miyon pesos, arma di candela, 181 municion, y diescinco smartphone. Tur esakinan a wordo confisca.
Autoridad Colombiano a graba video di e detencion, y a distribui nan tambe pa prensa y TV.
