Departamento di DNM a forma parti di e hurado pa proyecto di studiantenan pa un cas autarkico

ORANJESTAD (AAN): Recientemente studiantenan di Colegio Nigel Matthew, HAVO-Langtraject-2, na San Nicolas a presenta nan proyecto final pa e vak di Natuurkunde,

  ‘Con pa Traha un Cas Autarkico.’ Un cas autarkico ta un cas cu ta haci uzo di e elementonan di naturalesa y materialnan di naturalesa cu nos lo yama “pro-medio ambiente/cas sostenible”.

   Representantenan den nos comunidad cu tin e debido conocemento di e topico aki a haci e evaluacion di e proyecto final. DNM su colaborador Naviel Lue a forma parti di e hurado.

   E docente di Natuurkunde y Scheikunde (CSN) juffrouw Mariebelle van der Linde a bin cu e iniciativa  y idea di e proyecto aki.  Como proyecto e studiantenan di CSN mester a traha un cas autarkico.

   Nan mester a tene cuenta cu 4 aspecto di e cas. Un di e aspectonan tabata relata na aspectonan di medio ambiente. A base di un matrix di huzgamento pa e presentacion e hurado mester a califica e gruponan y nan proyecto.

   Loke cu e colaborador di DNM mes a conta ta cu tabata un experencia unico y educativo pa por a wak e studiantenan presenta nan idea di nan cas autarkico. Tabata great pa por a wak e studiante pensa riba diferente aspecto di un cas asina cu ta clasifica como off-grid, entre otro captura energia renobabel (renewable energy), cosecha awa, reuzo di awa,  uzo di materialnan di isolacion y maneranan pa por procesa sushi organico (gft-afval) via compost.  

   DNM a keda satisfecho cu e invitacion y e iniciativa di e docente. Tambe ta encurasha otro scolnan y docentenan pa bin cu proyectonan manera esun aki pa duna nos muchanan e libertad pa busca informacion di solucionnan pa problematicanan cu nos medio ambiente ta enfrenta.

   E generacion cu ta na scol awor ta esnan cu ta biba y wak e problemanan cu hopi hende di e generacionnan anterior a bira lomba p’e.