Despues di mas o menos 60 aña ta yama ayo na tur smokestack di Boilernan na WEB

Bista di e planta na Balashi ta cambia...

ORANJESTAD (AAN): E imagen cu tur hende tin di e planta di WEB Aruba NV, lo bay cambia awor.  E “pipanan di huma” grandi lo no tey mas!

   A construi e prome boilernan #1 y #2 na aña 1956. Den luna di october 2023 a inicia e ultimo desmantelacion di e smokestack di boiler #7, #6, #5 y #3.

   Na juni 2022, WEB Aruba a pone e di cuater planta RECIP den funcion, reemplasando asina tur sistema integral di boiler. E planta RECIP IV ta consisti di 6 motor RECIP cu un capacidad instala conhunto di 102 MW. Na momento cu planta RECIP IV a bay den operacion oficialmente, a continua e proceso di desmantelacion di e boilernan, cu pa decadanan a sa di genera energia pa nos isla.

   E motibo principal pa a bini cu e di cuater planta di motornan RECIP IV ta pa baha e consumo di Heavy Fuel Oil y baha emision di CO2. Despues di algun luna di operacion di RECIP IV y di a pone boiler y turbinanan di vapor for di servicio, WEB a logra baha e consumo di HFO cu mas di 900 bari pa dia. Nos ta gradici nos coleganan y contratistanan pa nan dedicacion y perseverancia durante e periodo di transicion.

   WEB Aruba NV awor ta produci energia cu motornan RECIP cu ta funciona cu Heavy Fuel Oil y cu intencion pa converti esakinan pa opera riba gas natural den futuro. Cu funcionamento di RECIP IV, WEB Aruba a dal un paso mas cerca pa alcansa su obhetivo pa baha su produccion di energia cu combustibel fosil na 50% y produccion cu energia renovabel na 50%. Esaki ta contribui na WEB Aruba su vision di un produccion mas limpi, mas berde y liber di Heavy Fuel Oil.

   Awor na aña 2023, despues di mas o menos 60 aña ta yama ayo na tur smokestack di boiler, cu a hunga un rol impactante den produccion di energia den siglo 20.

   WEB Aruba NV ta gradici tur empleado y contratista cu a forma parti di e era historico aki.