Darlaine Guedez-Erasmus, Parlamentario Fraccion di MEP:
ORANJESTAD (AAN): Den e dianan cu a pasa, Parlamento tabata tin diferente reunion den e comision fiho Famia y Adulto Mayor, cual ta presidi door di Parlamentario di Fraccion di MEP, Darlaine Guedez-Erasmus. E reunionnan aki tabata en conexion cu e ley di matrimonio di mesun sexo.
Relaciona cu e tema aki, dialuna mainta, Parlamentario Guedez-Erasmus a duna di conoce den conferencia di prensa di Fraccion di MEP, cu diferente reunion ta tumando lugar cu stakeholdernan y diferente grupo den comunidad. Ya caba tin tres siman cu e inicia cu e ronda di reunionnan. E reunionnan ta tumando lugar den Parlamento, cu e comision fiho pa asina nan por duna informacion y expresa nan pensamento riba e ley di iniciativa tocante matrimonio di mesun sexo.
Guedez-Erasmus a sigui bisa cu e bon di e reunionnan aki ta cu cada grupo por duna nan presentacion y cada Parlamentario por haci pregunta. E reunionnan a inicia cu grupo ICA (Iglesianan Cristian Aruba). Nan a laga sa cu nan ta mira e ley aki lo por afecta comunidad completo. Nan a trece dilanti e pro's y contra di e ley aki. Banda di esaki tabata tin e presentacion di grupo 'Orguyo' cu a presenta den sala di Parlamento. Ta hopi importante pa mira e punto di bista di cada partido, como e pro's y contra cu cada grupo aki ta duna, a bisa.
Siman pasa, a presenta den sala Obispado di Willemstad y ta algo masha aprecia cu nan a bin di Corsou pa duna un presentacion na Aruba caminda por a analisa e parti huridico, pero tambe e parti social cu e efectonan cu e ley aki por tin pa comunidad. E parti di norma y balor, cual nan a trece hopi ariba mesa, e parlamentario a indica.
"Mi ta hopi agradecido cu tur e gruponan por tabata tey presente. E tresnan aki te awor y tambe esunnan cu ta bay bini pasobra tin mas ariba agenda. Nos lo bay yama mas reunionnan cu otro organisacionnan. Tin cu ta manda carta y otronan cu nos mes ta acerca", a señala.
El a finalisa bisando cu ta hopi importante pa e Parlamentarionan por haya un bista riba e ley di iniciativa di matrimonio di mesun sexo y kico tur lo ta e cambio grandi cu e lo trece cu ne pa comunidad di Aruba.
