ORANJESTAD (AAN): E Banco di Seguro Social Aruba (SVb) conhuntamente cu e ekipo di ITP Caribbean
y cu colaboracion di e ekipo di Payroll Pro HRM ta sigui innova y cu e obhetivo di por sirbi miho na e comunidad di Aruba, a trece un desaroyo nobo den e portal MiSVb.
E portal MiSVb ta ofrece un cantidad di opcion independiente na tur dunado di trabou. Un di e servicionan aki ta pa realisa cambionan den e informacion di empleadonan.
Desde awo e portal lo duna dos opcion pa realisa e cambionan:
- Yena e cambionan individualmente, manera por a haci desde 2018.
- Yena varios cambio automaticamente door di upload un formulario electronico. E formulario aki ta wordo crea door di e software di payroll di e dunado di trabou.
Payroll Pro HRM ta e prome programa di payroll na Aruba cu ta ofrece e opcion aki pa tur nan clientenan. E paymaster ta haci e cambionan necesario di su personal den Payroll Pro HRM manera ta custuma y Payroll Pro HRM ta genera un formulario completamente aproba door di SVb cu tur e cambionan yena caba y cu por djis upload na e portal di SVb.
Ta posibel pa haci cambio manera cambio di adres, cambio di salario, cambio den e cantidad di ora pa traha, terminacion di contract, entre otro via e formulario genera door di Payroll Pro HRM.
Payroll Pro HRM semper tin como prioridad pa innova y pa duna su usuarionan e miho hermentnan pa por realisa nan trabou di un manera eficiente.
Pa e motibo aki e ekipo di Payroll Pro HRM ta duna un palabra di pabien na full ekipo di SVb y e ekipo di ITP Caribbean encarga cu e realisacion di e proyecto innovativo aki, cu sigur lo yuda hopi dunado di trabou pa traha mas facil y lihe.
