Director di SVb, Edwin Jacobs
ORANJESTAD (AAN) — Edwin Jacobs. Director di SVb, a bisa den entrevista cu DIARIO, cu gobierno di Aruba tin atencion riba e tema, cu tin un grupo di pensionado na Aruba cual suma di pensioen no ta yega pa nan sobrevivi, debi cu e costo di bida na Aruba ta sumamente halto.
“SVb tambe ta boga, for di e prome Foro Nacional di Hende Grandi cu a tuma lugar na 2022, a pidi atencion riba e problema cu ta afrontando caba, di pensioennan reduci, pa motibo cu un persona cu drenta Aruba bin traha, pero cu nunca lo yega 100% di AOV, y e pensioen di e trahado tampoco lo aporta hopi, mirando cu no tin hopi aña, y mirando cu no tin movecion riba esey ainda.
“Den cuadro di pensamento di gobierno pa atende cu e problematica aki, e prome paso cu a tuma ta pa duna un aumento substancial di e reparatie toeslag di 250 florin, y nos ta atendiendo esaki hunto cu gobierno.
“Nos tin algun dato pa nos tin indicacion con e ta bayendo y mi por mustra e datonan cu mi tin aworaki, pa loke ta trata e entrada cu nos a logra acumula hunto cu Departamento di Impuesto y mi por bisa cu di e pensionadonan cu ta ricibi pensioen di SVb hunto cu nan reparatie toeslag, cu ta otro entrada cu nan tin, gobierno a logra pusha e grupo cu aworaki tur hende tin un 400 florin minimo” Ir. Jacobs a splica.
Edwin Jacobs, mencionando cifranan, a sigui bisa cu aworaki tin 180 pensionado cu basa riba e calculo di Januari, cu ta entre 400 cu 600 florin; 593 ta entre 600 cu 800 florin; 1275 ta entre 800 cu 1000, y e grupo mas grandi ta concentra rond di 1400 cu 1600. E ta mas of menos casi 7700 pensionado ta recibi entre 1400 cu 1600 florin.
“Manera ta conoci e pensioen pa un persona soltero ta 1296, mas 450 di reparatie toeslag, pues ta riba 1700 florin. Ora bo tin bo pensioen completo mas reparatie toeslag, bo ta pasa 1700 florin”, Director di SVb, Edwin Jacobs a señala.
El a acentua cu esaki ta e situacion aworaki, y a indica cu gobierno ta haciendo mas calculo con pa fortifica e fuentenan di entrada pa e grandinan, pa wak con por combati e pobreza cu por existi bao di e grupo aki.
Edwin Jacobs a expresa cu e AOV, cu ta na caminda di cumpli 65 aña, y ora a introduci 65 aña pasa, gobierno a bisa cu el a introducie cu e meta pa combati y evita pobreza bao di nos hendenan grandi, akinan.
