Awor trahadornan por lesa Meter di WEB via smartphone

ORANJESTAD (AAN): Pa hopi tempo e trahadornan cu ta lesa meter, yama tambe “meteropnemernan” di WEB Aruba NV tabata uza ‘handhelds’ pa tuma e meterstand di clientenan tur luna.

   E software di e handhelds ta anticua y tambe no tin sosten mas for di e proveedo. Mester a cambia urgente e aparatonan aki.

   Mesora, departamento di ICT di WEB mes, a desaroya y a lansa un programa interno ‘MeterSprint,’ pa e Oficina di Meteropname y Billing por procesa e meterstandnan. Ademas, a desaroya un mobile app, ‘MeterWalk,’ pa uzo riba smartphone.

   E programanan aki ta opera den cloud, cual ta nifica cu por realisa data inmediatamente den WEB su sistema administrativo di cliente. Cu e desaroyo aki WEB su departamento di ICT mes lo por brinda un sosten interno locual lo facilita e procesamento di informacion y funcionamento di e programa.