Despues di 6 aña UFA tin speransa cu nan preocupacionnan lo ser tuma na serio, trata y implementa

Diego Acevedo, representante di United Farmers Aruba

ORANJESTAD (AAN): Den un entrevista cu DIARIO, señor Diego Acevedo, representante di United Farmers Aruba Association (UFA), a elabora tocante e desaroyo di e asociacion, cu tin un papel fundamental den e economia di Aruba.

   Señor Acevedo a remarca cu actualmente e asociacion ta consisti di casi 40 miembro, tur interesa den e sector primario di Aruba. E asociacion ta uzando diferente tecnica. No  solamente plantacion den tera, sino tambe hydroponics. Entre e miembronan tin esnan cu ta dedica na cria di abeha, cultivo di mushrooms, entre otro tipo di produccionnan.

   Segun Acevedo, UFA a tene varios reunion tanto cu Gobierno como cu Parlamento, y na tur ocasion nan a expresa cu e sector di agricultura mester haya mas apoyo. E preocupacionnan principal cu UFA a presenta ta inclui, entre otro, e tema di awa, coriente, tereno, duana y e fortalecemento di Santa Rosa.

   Sinembargo, el a lamenta cu te aworaki no a haya un respuesta fiho tocante loke por haci pa mehora e situacion. Riba e tema di awa, Acevedo a splica cu a logra pa haya un meter di WEB pa agricultura. Pa cu esaki, nan ta gradici.

   “E proyecto AIP lo sin duda trece un gran aportacion pa e sector, pero nos no kier cu e otro puntonan cu nos a trece dilanti keda atras. Nos ta pidi cu Parlamento y Gobierno finalmente trata e preocupacionnan di UFA, cu ta riba mesa ya pa mas di seis aña,” señor Acevedo a subraya.

   Ademas, señor Acevedo a menciona cu tin biaha Gobierno ta fracciona den e manera cu e tema di agricultura ta wordo trata. “Ora ta papia di transparencia den otorgamento pa tereno, ta necesario cu varios minister traha hunto. Minister di Infrastructura mester coordina cu Minister di Sector Primario, y mescos cu Minister di Energia,” el a bisa. “Nos speransa ta cu e puntonan cu nos a presenta lo wordo tuma na serio, trata y implementa.”

   Acevedo a propone cu lo ta ideal pa forma un grupo di trabou interministerial, pa duna seguimiento y atencion efectivo na e preocupacionnan di UFA.