“Desperdicio organico por bira un recurso valioso pa Aruba”

Parlamentario Jennifer Arends-Reyes:

ORANJESTAD (AAN): Recientemente Parlamentario Jennifer Arends-Reyes, Presidente di Comision di Turismo di Parlamento, a participa hunto cu Minister di Turismo Wendrick Cicilia na un encuentro na Alto Vista Winery, den cuadro di e iniciativa ‘Compost Alliance.’

Compost Alliance ta un proyecto di Iberostar cu ta reuni diferente hotel y partner, entre otro Aruba Airport Authority (AAA), pa transforma resto di cuminda y otro desperdicio organico den compost. Di e manera aki, material cu, normalmente lo wordo benta afo, ta haya un segundo bida como un recurso util pa agricultura, naturalesa y mantencion di areanan berde.

E iniciativa ta un ehempel concreto di economia circular: en bes di mira desperdicio como algo sin balor, e ta wordo procesa y converti den un producto cu por beneficia Aruba atrobe.

“E iniciativa aki ta mustra cu mediante cooperacion y creatividad, loke normalmente nos ta mira como desperdicio, por bira un recurso valioso cu ta beneficia henter nos isla. Esaki ta sostenibilidad den practica,” Arends-Reyes a declara.

Segun e parlamentario, Aruba mester sigui stimula proyectonan cu ta promove menos desperdicio, mas reutilisacion di recurso y un industria turistico cu ta contribui activamente na sostenibilidad. Como isla turistico, diariamente nos ta produci un cantidad considerabel di desperdicio. P’esey, sector publico y priva mester uni forza pa busca solucionnan innovativo cu ta contribui na un medio ambiente mas limpi y saludabel.

Arends-Reyes a enfatisa cu turismo sostenibel no ta trata solamente di proteccion di naturalesa, sino tambe di responsabilidad, educacion y cooperacion. Hotel, aeropuerto, empresa, productor local y gobierno tur por hunga un rol importante den e transicion pa un economia mas circular.

“Nos industria turistico ta un motor importante di nos economia, pero e por bira tambe un motor di cambio positivo. Iniciativanan manera Compost Alliance ta demostra cu crecemento economico y cuido di nos medio ambiente por bay man den man,” e parlamentario a expresa.

Arends-Reyes a gradici General Manager di JOIA by Iberostar, Sr. Arnaud Le Lanchon, y ing. Jareth Vermeulen, Destination Steward Manager, pa e invitacion, e informacion comparti y nan caluroso acogida.

“Mi ta kere den proyectonan cu ta uni hende y sectornan pa crea algo positivo pa Aruba. Paso pa paso, nos por reduci desperdicio, cuida nos naturalesa y construi un futuro mas sostenibel pa nos isla,” Arends-Reyes a finalisa.