Un siman di aventura cu descubrimento y conexion
ORANJESTAD (AAN): Asociacion Trabao di Hubentud na Aruba (ATHA) ta organiza su ATHA Tweens Camp 2026, un camp specialmente prepara pa muchanan den edad di 8 te cu 13 aña, cu ta tuma lugar di 10 te cu 14 di augustus 2026.
Cu e Tweens Camp, ATHA kier ofrece muchanan un vakantie activo y diferente, unda nan no solamente ta pasa bon, pero tambe ta haya oportunidad pa descubri Aruba, experimenta actividadnan nobo, traha den team y crea amistad.
ATHA ta mira cu e grupo di “tweens” tin necesidad di actividadnan cu ta combina aventura, movecion, independencia y contacto social. P’esey, en bes di un camp tradicional na un solo sitio, ATHA a opta pa un programa cu cada dia ta hiba e participantenan den un otro ambiente y un otro experiencia.
Durante e siman, e muchanan lo participa den diferente actividad manera bustrip rond Aruba, kayak, actividadnan di lama y beach, piscamento, bishita na rif, traha kampvuur, bishita na Waterpark y core cabay, combina cu weganan y actividadnan di grupo.
Den e bustrip, e tweens lo tin un experiencia diferente unda durante nan bustrip nan lo para na diferente punto cu nan ta wak sushi riba caya. Aki nan lo baha y competi cu piki sushi. Di e forma aki e proyecto ganador di Poder di Hubentud 2023, unda e muchanan lo por conoce e iniciativa y su impacto den comunidad ta sigui keda realisa den forma duradero.
E programa ta pone enfasis riba participacion activo, trabao den team, responsabilidad, creativity y descubrimento. Pa ATHA, vakantie no solamente mester ta un periodo pa mucha keda ocupa, pero tambe un oportunidad pa nan siña, explora posibel interes nobo y crea recuerdonan positivo.
“Nos kier cu nos muchanan por bisa na final di e siman: “mi a haci algo cu mi no lo haci facil.” Esey ta e esencia di Tweens Camp. Duna nan oportunidad pa sali for di rutina, conoce otro mucha, descubri nan isla y experimenta cosnan nobo den un ambiente sigur y positivo,” Director di ATHA ta indica.
E edicion 2026 ta destaca tambe pa su fuerte participacion comunitario, cu 120 mucha, 15 hoben lider y 17 boluntario adulto cu lo guia, acompaña y apoya e grupo durante tur actividad.
Organizacion di un camp di e magnitud aki ta exigi hopi preparacion, coordinacion y colaboracion. ATHA ta expresa su aprecio na tur e organizacionnan, empresanan, profesionalnan, lider y voluntarionan cu ta contribui pa haci e diferente experencianan posibel.
Cu Tweens Camp 2026, ATHA ta continua su compromiso pa crea mas oportunidad di desaroyo y participacion pa mucha y hoben na Aruba, especialmente durante e vakantie grandi.
Asociacion Trabao di Hubentud na Aruba – ATHA ta dedica su trabao na formacion di mucha y hoben na Aruba y na crea oportunidadnan cu ta contribui na bienestar, desaroyo y participacion di mucha y hoben.
